Guwahati, Risaw:
Ka seng BJP ha Assam kaba bat ïa ka jingsynshar ha ka jylla ka la jied ïa ki kyrteng jong ki kyrtong ki ban ïakhun ha ki lai tylli ki Assembly konstitwensi kaba la dei ban pynlong ïa ka ilekshon shiteng samoi, la ong u heh nongïalam jong ka seng ha ka jylla u Bhabesh Kalita.
U Kalita u la ong ba ka Election Committee jong ka seng BJP ha ka jylla kaba kynthup ïa u Myntri Rangbah u Himanta Biswa Sarma, u Myntri ka sorkar kmie u Sarbananda Sonowal, u heh nongpynïaid jong ka seng u Harish Dwivedi bad u General Secretary jong ka seng ha ka jylla u GR Ravindra Raju ki la long napdeng kiba bun ba la ïakynduh ha Guwahati ha kine ki khyndiat sngi ba la leit.
Ka Election Commission jong ka India, ka la pynbna ïa ka tarik ban pynlong ïa ka jingthep vote shiteng samoi ha ki san tylli ki Assembly konstitwensi ha Assam. Ïa kane ka ilekshon shiteng samoi yn pynlong ha Bongaigaon, Sidli, Behali, Samaguri, bad Dholai ha ka 13 tarik, Naiwieng bad ka jingñiew vote kan long ha ka 23 tarik, Naiwieng. Ïa ka Gazette Notification yn pynmih ha ka 18 tarik, Risaw bad ka tarik ba khatduh ban thep kyrteng ka long ha ka 25 tarik, Risaw.
Ka jingkhmih bad jingbishar bniah ïa ki kot thep kyrteng la buh ba kan long ha ka 28 tarik, Risaw bad ki kyrtong ki lah ban weng noh ïa ka jinglong kyrtong jong ki ha ka 30 tarik, Risaw. Ïa ka ilekshon shiteng samoi la donkam namar ka jingjied ïa ki MLA ba mynta sha ka Lok Sabha ha ka General Election kaba la long ha kaba sdang jong une u snem.
Ki MLA kiba la shahjied sha Lok Sabha ki kynthup ïa u Parimal Suklabaidya jong ka BJP uba mihkhmat ïa ka bynta jong ka Dholai Assembly konstitwensi bad uba la jop ïa ka shuki Cachar Lok Sabha konstitwensi bad u Ranjit Dutta na Behali uba la ïoh bat ïa ka shuki ha Tezpur Parliamentary konstitwensi.
U nongïalam barim ka AGP, u Phani Bhushan Choudhury, uba la bat ïa ka Bongaigaon konstitwensi naduh u snem 1985, u la jop ban ïakhun ïa ka Barpeta Lok Sabha konstitwensi, katba u Joyanta Basumatary jong ka UPPL, u la jop ïa ka Kokrajhar konstitwensi hadien ba u la mihkhmat hashwa ïa ka Sidli.
U Rakibul Hussain jong ka Congress, uba dei u MLA ba san sien na Samaguri, u la ïoh khur ïa ka jingjop ha Dhubri. Ha kane ka ilekshon shiteng samoi, ka BJP kan ïakhun ha ki lai tylli ki konstitwensi kata ka Behali, Dholai, bad Samaguri. Katba ki seng synrop jong ka, kiba kynthup ïa ka Asom Gana Parishad (AGP) bad ka United People’s Party Liberal (UPPL) kin pynïeng kyrtong ha Bongaigaon bad Sidli.
Shwa ïa kane, u Myntri Rangbah ka jylla u Himanta Biswa Sarma u la pynpaw ïa ka jingsngewskhem ban ïoh ïa ka jingjop ha ka por ba u leit sha Chirang ha ka 18 tarik, Nailur, hashwa ban pynlong ïa ka ilekshon shiteng samoi ha Sidli. “Ngi la ïamir jingmut ha kaba ïadei bad ka jingjied kaba khatduh ïa ki kyrtong ban ïakhun ha ka ilekshon shiteng samoi kiba dei ban ïakhun na ka bynta ka Behali, Dhalai bad Samaguri konstitwensi. Ki lai tylli ki kyrteng na man kawei pa kawei ka konstitwensi la phah sha ka Parliamentary Board jong ka seng ha kaba kane kan sa pynbna ïa ki kyrteng jong ki kyrtong ha kine ki sngi ban sa wan ha kaba kin sa ïoh ïa ki tiket,” la ong u Bhabesh Kalita.
