Jowai, Risaw 18
Ka Meghalaya State Pollution Control Board (MSPCB) ha ka Sngi Thohdieng ka la pynlong ïa ka jingpynsngew paidbah ne ‘Public Hearing’ na ka bynta ka jingthmu ban tei karkhana pynmih dewbilat kaba thymmai ïa kaba tip kum ka MS Meghatop Private Limited ha ka shnong Wahïajer, Narpuh jong ka East Jaiñtia Hills District.
La jan baroh ki nongshong shnong bad ki nongïalam shnong ka thaiñ Narpuh ki ai ka jingkyrshan ïa kane ka karkhana dewbilat bathymmai lait noh ka KSU, FKJGP, HITO, HANM nalor kiwei-kiwei ki sengbhalang.
La sakhi ba ha kane ka jingpynsngew paidbah, bun ngut ki briew ki la ïeng pahara bad ki dieng kiba la pynkhreh bha hashuwa ban poi shaka jaka pynlong ïa ka ‘Public Hearing’ da ka jingthmu ban ym ailad ïa ki briew ne kynhun kiba thmu ban pynpaw ïa ka jingpyrshah jong ki, ha ka ban tei ïa katei ka karkhana pynmih dewbilat.
Katto-katne na ka jingkren na ki liang kyrshan, u Dolloi Elaka Narpuh, Bah Manbha Kyndoh haba pynpaw ïa ka jingkyrshan u la ong, “Ka Dorbar Elaka Narpuh da kawei ka jingmut ka ai ka jingkyrshan kaba pura ïa ka MeghaTop Cement Private Limited halor ka nongrim ban wanrah jingmyntoi ïa ka shnong, ka Elaka, ïa ka distrik bad ka Jylla da kaba kyntu ruh ïa ka Sorkar ban pynkloi ban ai ‘Clearance’ khnang ba ka kompeni kan pyntreikam noh ïa ka jingthmu jong ka.”
Na ka liang u General Secretary Shnong Sonapyrdi, Bah Daïapherbha Lamare u la pynpaw ba ka jingkyrshan jong u ïa kane ka karkhana bathymmai ka dei namar ka jingsngewkhia ïa ka jingkyrduh kam kyrduh jam jong ki khun samla ka thaiñ kaba ïalam pat sha ki kam sniew ba bun jait jong kane ka juk kaba mynta.
U la kyntu ruh ïa ki nongpynïaid ka karkhana ba kin pyntikna ba ka ïoh ka kot bad ka mariang kan dei ban long kaba ïadei khnang ban pyntikna ïa ka jingroi-jingpar kaba neh bad ka lawei kaba neh khnang ban ïoh ïa ka jinglong kaba ïadei hapdeng ka ïoh ka kot bad ka mariang.
Kiwei de kiba la ai ka jingkyrshan bad kiba ïashim bynta ha ka jingpynsngew paidbah ki long u MDC barim ka Narpuh, Desous Pohshna, Love You Bareh Waheh Shnong Pyrtakuna, Vailin Suchiang, Waheh Shnong Tongseng, Sailen Sutnga nalor kiwei.
