Washington, Risaw:
U president ka United States, u Joe Biden ha ka Sngi Palei, u la iaroh ia ka jinglah jong ka Israel ban bud-dien bad ban pynliem noh syndon ia u nongialam ba hakhlieh jong ka kynhun lehnoh Hamas na Gaza- u Yahya Sinwar bad u Biden ha kane ka por u la ong ba kane ka long ka khubor kaba bha ia ka pyrthei baroh kawei, da kaba ong ruh ba kane ka long ka lad ban wanrah noh ia ka jingiabeit ha ka jingiakren iasuk bad ban sangeh thma ha Gaza.
Kumjuh ruh ka Vice- President Kamala Harris, ka la ong ba ka jinglah jong ka Israel ban pynliem noh ia utei u nongsuh buit ia ka jingleit thombor sha Israel ha ka 7 tarik u Risaw, 2023, ka long kaba biang tam bad ka long ruh ka lad ban ioh ban pynkut noh ia ka thma hapdeng ka Israel bad ki Hamas hapoh Gaza.
Kane ka khubor ka long ruh katba ka US ka dang kyntu tyngeh ia ka Israel ba ka dei ban sangeh noh ia ka thma ha Gaza watla ka US ka ju ai jingkyrshan ia ka Israel na ka por- sha ka por.
Kumta, ha katei ka sngi u Biden u la ong ba ka jingiap jong utei u nongialam ka Hamas, uba long u nongsuh buit ia ka jingleit thombor ki lehnoh Hamas sha Israel naduh kaba sdang jong kane ka thma, ka long ka kabu ksiar ban ioh ban wanrah noh ia ka jingiasuk bad ka jingsangeh iasiat hapdeng ka Israel bad ki Hamas hapoh ka nongbah Gaza.
Ha kajuh ka por, u Biden u la ong ruh ba un sa leit ban iakynduh markhmat bad u Myntri Rangbahduh ka Israel ban ioh ban ai khublei kyrpang ia u halor ka jingjop jong ka Israel ba ka la lah ban pynkhyllem noh ia utei u nongsuh buit bad u nong wanrah thma. Hynrei, ha kajuh ruh ka por u Biden u la ong ba ha kane ka sien ka jingleit kynduh jong u ia utei u nongialam ka Israel, un pyrshang katba lah ban pynbor bad ban pynkohnguh ia utei u nongialam ba un sangeh noh ia ka thma bad ban ioh ban pynphai iing noh ruh ia baroh kito kiba shah rahbor bad kiba dang don ha ka kti ki lehnoh Hamas haduh kine ki sngi.
Ka United States ha ki khyndiat sngi ba la leit, ka dang dep maham ia ka Israel ba lada ka Israel ka pynslem ban ailad ban pynpoi ia ki jingïarap sha ki paidbah nongshong shnong ka Gaza, ka Israel ruh ka lah ban duh noh syndon ia ki jingïarap kiba ka US ka la thmu ban phah sha Israel.
Nalor kata, ka US ka la pynpaw ruh ia ka jingpyrshah jur halor ka jingleit thombor pat jong ka Israel sa sha Beirut, hapdeng ka jingiakynad jong ka Israel bad ki lehnoh Hezbollah jong ka ri Lebanon.
Shuh shuh ruh la ong ba ka Israel ka dang pyn-ap ba kan leit ban kput sa ia ka Iran halor ka jingleit thombor jong ka Iran ia ka Israel ha kine ki khyndiat taiew ba la leit, ha kaba u Biden u la kyntu ia ka Israel ba kam bit pat ban ther bom ne ther ‘namding sha kito ki bynta ba don ki jaka buh tiar nuclear jong ka Iran.
