Shillong, Risaw 18
U Myntri ka tnat jngohkai pyrthei, Bah Paul Lyngdoh u la ong ba ïa ka Shillong Ropeway projek kaba dei ban pynïasoh na Lawsohtun sha Lum Shyllong yn shna katkum ka kyndon jong ka Dewbah Europe kaba tip kum ka ‘CEN Standard’.
U Bah Paul u la ong ba kane ka Ropeway projek kaba la buh mawnongrim da ka President ka ri ka Draupadi Murmu yn sa plied noh ïa ki kot ki sla jong ki kompani kiba la thep ‘tender’ kiba kynthup ïa ki jnit ki jnat kiba la pyni na ka bynta ban pyntrei ïa ka projek (technical bid), bad kawei pat ka dei ka bynta kaba ïadei bad ka jingbuh dor ïa ka jingmang pisa (financial bid) ban pyntrei ïa ka projek.
Kumta u la ong ba kine ki bynta baroh ar tylli shen yn sa plied noh bad kano-kano ka kompani kaba shah jied kan ïoh ban pyntrei ïa ka Ropeway projek bad hap ban leh katkum ka CEN Standard’ kaba dei ka rukom pyntrei ïa ki ropeway projek ha pyrthei kiba la leh da ka Dewbah Europe.
