Mawkyrwat, Risaw 18
Ka kynhun ki Hati khlaw ha ka miet jong ka 16 tarik u Risaw 2024 ha ka por kumba 10:30 eiei ka la thombor bad hiar thma ïa ka shnong Panchiring, South West Khasi Hills District ha kaba ki la pynjulor ïa ki jingthung-jingtep bad ïa kawei ka ïing.
Katei ka ïing kaba la shah pynjulor ka dei jong u Bah Jestar Syiemlieh (Bam Kwai ha Dwar U Blei) ïa kaba la shong la sah da ki para jong u bad ki jingthung-jingtep kiba la shah pynjulor ki kynthup ïa u kwai ,tympew, kait bad kiwei-kiwei. Katkum ki tyllong khubor ba la ïoh lum na u Myntri Shnong Panchiring, u Bah M. Kharbani u la ïathuh ba ha katei ka jingjia ym shym la don ba mynsaw bad u la ïathuh ruh ba donbok ha katei sngi ba wan thombor ki Hati, ha katei ka ïing ym shym la don briew.
U la ïathuh ruh ba ha kaba ïadei bad katei ka jingjia namar ka jingsngew sohsat ïa ka jingwan pynjot pynjulor ki Hati, ki paidbah shong ha ka step kaba bud, kata ka 17 tarik u Risaw ki la lum paidbah bad pyrshang ban beh hynrei kaba sngewsih ka long ba kim lah leh eiei namar kitei ki Hati kim phet bad haduh mynta ki dang don hajan shnong, ïathuh u Bah M .Kharbani. Kumta na ka liang ka Dorbar Shnong Panchiring bad ki nongshong shnong kiba mynta ki don hapdeng ka jingtieng bad jingshong syier ïoh lehse kitei ki hati kin wan thombor biang bad kyrpad ïa ka Sorkar ban leh eiei ban thaw lad na ka bynta ban beh noh ïa kitei ki hati.
Ka Dorbar Shnong Panchiring ka dawa ruh na ka Sorkar ba ka dei ban siew bai lutksan khamtam eh ïa ka ïing kaba la shah pynjulor kumjuh ruh ban siew bai lutksan halor ki jingpynjot jong ki hati ïa ki jingthung-jingtep bad lada ka Sorkar kam leh eiei, na ka liang ki paidbah shnong bad kin sa shim da kawei ka rai wat ban siat ïap ïa ki kitei ki hati.
