Nongstoiñ, Risaw 18
U Deputy Commissioner (Election) jong ka West Khasi Hills u la pyntip sha ki paid nongshong shnong jong ka District ba katkum ka jingbthah jong ka Election Commission jong ka Ri India, kan don ka jingpynrung kyrteng thymmai biang ïa ki nongthep ‘vote’ kiba la dap 18 snem ka rta kat haduh ka 01.01.2025.
U DC u la ong ruh ba ha kaba ïadei bad kane ka kam, la thung kyrpang ïa ki briew Sorkar (Booth Level Officers) ki ban wan ha ki shnong kata ha ki Polling Station ne jaka thep ‘vote’ naduh ka 29 tarik u Risaw, 2024 haduh ka 28 tarik u Naiwieng, 2024 bad lada don kino-kino ki jingbakla lane jah kyrteng ruh ha ka Photo Electoral Roll lah ban leit ujor ha kitei ki sngi bad por ba la kdew haneng bad ïa ka dur Electoral Roll ba la dep pynkhreh lah ban leit peit ha ki Polling Station ha kitei ki tarik.
Shuh shuh na ka liang jong u DC, u la kyrpad ïa ki nongïalam shnong ban ai ka jingpyntip paidbah ha ki shnong ki thaw jong ki ban pynrung kyrteng thymmai ha ka Electoral Roll kiba la dap 18 snem ka rta kat haduh ka 1 tarik u Kyllalyngkot, 2025 bad ban pynbiang lypa ïa ki kot jingpynshisha kum ka syrnod sngi-kha, syrnod skul, syrnod baptismal, ID Card, Driving license, ar tylli ki dur passport bad kiwei kiwei.
U la ong ruh ba ka sngi ban pynmih ïa ka Draft Electoral Roll kan long ha ka 29 tarik Risaw, 2024, ban pynrung kyrteng bad jingujor 29 tarik Risaw haduh 28 tarik Naiwieng, 2024, ki sngi ban pynrung kyrteng 15, 16, 21 bad 22 tarik Naiwieng, 2024, ban bishar ne kyntait ïa ka jingpynrung kyrteng lane ujor 24 tarik Nohprah, 2024 bad ka sngi ban pynmih ïa ka Final Electoral Roll kan long ha ka 6 tarik Kyllalyngkot, 2025.
