Nongstoiñ, Risaw 20
U Bah Pyndapbiang F.Wanniang uba long u nonghikai, ‘Counsellor’, ‘Artiste’ bad ‘Theologian’ u la ong ba ban ïoh ïa ka jingpynkhiah na ka jingpang kyrni drok, dei ban leh ïa 5 tylli ki kamram. Ïa kane na ka liang jong u Bah Wanniang u la kren ha ka program ai jinghikai bad ha ka kylla ai jingkylli halor ka phang, “Drug – Addiction and Substance Abuse” kaba la pynïaid da ka Mawrusyiar Youth and Cultural Club (MYCC) bad Ferrando Secondary School Mawrusyiar Alumni ha ka jingïatreilang bad ka Nehru Yuva Kendra Sangathan, Ministry of Youth Affairs & Sports Govt. of India, Nongstoin, West Khasi Hills District , ha ka Sngi Thohdieng kaba la sdang ruh ïa ka ‘Awareness’ bad ‘Education Programme’ ba 8 sngi ïa kaba la pynlong ha ka skul Ferrando Secondary School, Mawrusyiar.
U Bah Pyndapbiang u la pynpaw ruh ïa ka jingsngewkhia halor ka jingjyllei jong ka jingkhaïi bad ka jingdih drok hapoh ka thaiñ bad ka Jylla hi baroh kawei.
Nalor katta, u Bah Pyndapbiang u la ai ruh ka jingpynshai haba ïadei bad ka ‘Drugs Abuse & Addiction’, bad ka rukom pyndonkam bakla ïa ki drok, ha kaba u la ïathuh ruh shaphang ki jait drok kiba kham jyllei ha kine ki sngi kum u ‘Heroin’, u kynja bad ki ‘Prescription Drug’ bad ban ban jur ïa ki jingktah jong ki lada pyndonkam bakla.
U Bah Pyndapbiang u la kdew ruh ïa ki daw kiba kham kongsan kiba pynlong ïa ki khynnah bad ki samla ba kin ngop ha une u jait jingdih uba shyrkhei bad u la ban jur ruh ïa ki jingktah jong u drok la ka dei ha ka koit ka khiah, ka jingim shimet, ka jingïadei bad ki bahaïing hasem, ha ka imlang-sahlang bad ka jingim ba kynja mynsiem.
Na ka liang jong u Bah Pyndapbiang ban pynshai shuh-shuh ïa kine ki jingktah, u la pyni ruh ïa ki durkhih kiba la pynwan dur ban pyni ïa ka jingma jong u drok, kaba ai jinghikai shibun eh ïa ki samla kiba don ha kane ka jingïalang bad kiba long ruh ka jingkyntu ïa ki ban kiar na une u jingdih.
Ha ka kylla ai jingkylli bad ka jingïaphylliew jingmut bad kine ki samla halor ki lad ai jingsumar ïa kiba la ngop ha kane ka jait jingpang, u Bah Pyndapbiang u la ong ba don san tylli ki kamram kiba u/ka ba la ngop ha kane ka jingpang bad ka imlang-sahlang ki dei ban leh bad kita ki long – ‘Psychologically’ha kaba ïadei ban leit ban shah ai ‘Counselling’ ha ki ‘Counsellor’ ba la pynbit.
Kaba ar u la ong – ‘Medically’, kata ki dei ban leit shim dawai na ki doktor, ban leh ‘Detoxification’ ne ban wad jingïarap na ki doktor. U la ong ruh kaba lai ‘Socially’, ka dei ban wad jingïarap na ka imlang-sahlang kata na ki bahaïing hasem bad kiwei-kiwei ha shnong ha thaw bad imlang-sahlang ka dei ban ai mynsiem bad kim dei ban i-beiñ ïa kiba kum kine ki briew hynrei ki dei ban ïai pynshlur ïa ki ban ïaleh bad ban im ka jingim kaba bha.
Shuh shuh haba phai sha ka ‘Environmentally’, ha kaba ki dei ban kiar na ki paralok kiba bam ba dih ne na ki jaka ba suk ban ïoh ïa une u jingdih ïoh ki kum phai dien biang, bad kaba khatduh ka dei ka ‘Spiritually’, kata ban pynkhlaiñ ïa la ka jingngeit kaba ki don, dei ban wad jingïarap na u Blei Trai Kynrad Nongbuh Nongthaw, ban da leit sha ki nongïalam niam ban ïasaid lem na ka bynta jong ki.
Shuh shuh ha kane ka sngi ban pynkut ïa kane ka jingai jinghikai la ïawer ïa baroh ban pyrta ïa ka kyntien kyrsiew (slogan), “ONG EM ÏA U DROK” ha kaba la ïa pyrta lang ha kawei ka sur ban pynskhem ïa ka nia kaba mih na kane ka jingai jinghikai.
