Shillong, Risaw 20
U nongaiktien ka Voice of the People’s Party (VPP), Dr. Batskhem Myrboh u la ong ba hadien ba ki paidbah ki la jied ïa u Dr. Ricky A.J Syngkon u kyrtong ka seng ban long u MP ka Lok Sabha na Shillong, kumta ka la donkam ïa ka VPP ban pynïar ïa ka rukom treikam sha Rilum Garo.
U la ong ba ka VPP ka la jop ha ki 32 tylli ki konstitwensi ha ka ilekshon MP hynrei kam kwah ban kut tang ha Rilum Khasi bad Jaiñtia hynrei ka kwah ban pynïar ïa ka jingtreikam sha Rilum Garo haba ki don lang ha kawei ka jylla. U la pyntip ba ka jinghiar u President ka VPP sha Rilum Garo ka long ban ïakynduh ïa ki nongïalam ban pynshai ïa ka nongrim jong ka seng bad kiwei.
U la pynshai ruh ba halor ka bhah thungkam thungjam, ka seng kam shym la pyrshah ïa kano-kano ka jaidbynriew hynrei ka ïeng halor ka nongrim, hynrei kiwei ki seng saiñpyrthei ki pynsngewthuh bakla ïa ki paidbah.
Shuh shuh u la pyntip ba ka VPP ka la dep thung ïa ki katto-katne ngut ki adhoc organising secretary ha ki district ha Rilum Garo.
“Ngi lah ban ong ba ha Rilum Garo ki don ki bynta kiba dang sahdien, ka dei namar ki nongïalam kim don jingkitkhlieh,” u la ong. U la pyntip ruh ba ki paidbah ki la kyntait ïa ka Congress hadien ka jingmih noh u Dr. Mukul Sangma bad ki la ai noh ïa ka NPP ha jingïalam u Conrad hynrei ki paidbah ki la kyntait ïa kane ka seng ha ka ilekshon MP kaba dang shu dep.
Haba kylli ka don ka jingpynkhreh ïa ka ilekshon MDC ha Garo Hills Autonomous District Council (GHADC), u Dr. Batskhem u la ong ba ïa mynta ka seng kan pynkhreh shwa ïa ka ilekshon MDC ha KHADC bad JHADC.
