Jowai, Risaw 20
Ka Lion Sports and Youth Affair ka la long ka lahduh ha ka 2nd Division Football Tournament (7th Debo Shullai Memorial Trophy) ba la pynïaid da ka West Jaiñtia District Sports Association (WJDSA). Kane ka wan urlong hadien ba ka la pynliem ïa ka Nangbah Dukhu da 2-1 kol ha ka jingïakhun final kaba la long ha ka sngi Saitjaiñ ha Kiang Nangbah Stadium, Jowai.
Ha lyndet jong kane ka nam jop, ka la wan lyngba ka jingïoh thep kol da u Wailad Dame Niangty ha ka mint 30 bad Prosperwell Dhar ha ka minit ba 40. Katba ka shi kol jong ka Nangbah Dukhu la thep da u Lamchwa Dong ha ka minit 63 uba la ïohpdiang ruh ïa ka khusnam Man of the Match hadien ba u la lah ban ïalehkai bha ha kane ka jingïalehkai final.
Ha kane ka aïom ïalehkai u Prosperwell Dhar (Lion Sports and Youth Affairs) u la ïohpdiang ïa ka khusnam Top Scorer, katba u Wandari o Chyrmang (Nangbah Dakhu) u la ïohpdiang ïa ka nam Best Goalkeeper bad u Thuara Nampui (Nangbah Dukhu) u la ïohpdiang ïa ka khusnam Player of the Tournament.
Ïa ki khusnam la sam da ki bahaïing bahasem jong u (L) Debo Shullai kiba kynthup ïa u MLA South Shillong u Bah Sanbor Shullai kum u kongsan bad kiwei kiwei ha ka jingïadonlang ki dkhot nongkitkam ka WJDSA.
Ha katei ka sngi ka WJDSA ka la pynkup burom ruh ïa ki khynnah ïalehkai Under-14 Boys kaba long ka lahduh ha ka Meghalaya Youth League 2024 ba la pynlong da ka Meghalaya Football Association.
