Shillong, Risaw 20
Ka Nongkrem SC ka la long sa kawei pat ka kynhun kaba la rung sha ka final jong ka Second Division Football League 2024 ba la pynïaid da ka Shillong Sports Association, hadien ba ka la lah ban pynliem noh ïa ka Laitkyrhong SC da 3-2 kol ha ka sngi Saitjaiñ ha SSA Stadium kaba ha First Ground, Polo.
Ha kane ka jingïakhun semi final ba ar, ka Laitkyrhong ka la ïoh ban pynkhih jar nyngkong eh lyngba u Shngaiñlang Surong ha ka minit kaba 6, hynrei hadien phra minit ka Nongkrem ka la pynïakhaid kylla lyngba u Zothanpuia Bawihtlung. Ha shwa ban kut ka jingïalehkai jong ka kylla step ka Nongkrem ka la thep biang sa shi kol lyngba u Wilbert Marbaniang (45+3) na ka bynta ban tam da 2-1 kol.
Wat la kine ki kynhun ki la bteng ban ïakhun tyngeh, hynrei kim shym la lah ban thep kol. Ha shwa ban wai ka Laitkyrhong ka la thep biang ïa ka kol ba ar lyngba ka penalty ba la shut da u Samuel Suting (90+1), hynrei tang hapoh san minit ka Nongkrem ka la pynphai biang sa shi kol lyngba u Donkupar Kharmyndai (90+6) na ka bynta ban ïoh syndon ïa ka jingjop.
Lyngba kane ka jingjop ka Nongkrem kan ïakynduh final pyrshah ïa ka Meghalaya Police F.T, kaba la jop ïa ka Jongksha SC da 2-0 kol ha ka semi final kaba nyngkong. Kumta ka Nongkrem bad ka MLP ki la lah ban pynthikna ban kiew kyrdan sha ka First Division ha kaba kin ïoh ban shim bynta ha ka aïom ban wan jong u snem 2025.
Ka jingïalehkai jong ka First Division Football League 2024 ha ka Lah Sngi U Blei kan long hapdeng ka Umphyrnai SC pyrshah ïa ka Lawsohtun SC (11:45 mynstep), katba ka Mylliem SC ïa ka Nongkseh SC (2:30 nohphai sngi).
