Shillong, Risaw 20
Ka Nongrim Hills SC bad ka Sawmer SC ki la ïasam mar shi point ha ka sien kaba nyngkong eh ha ka OC Blue Shillong Premier League 2024 hadien ba ki ïakhaid mar 1-1 kol ha ka sngi Saitjaiñ ha SSA Stadium kaba ha First Ground, Polo.
Hadien ka jingjop ïa ka Nangkiew Irat, ka Sawmer ka la bteng ban ïakhun tyngeh ha kaba la ïoh ban pynkhih jar tang mar ïasdang ka jingïakhun ha ka minit kaba 4 lyngba u Diego Khyriem.
Kane ka shi kol ka la nang pynïoh mynsiem ïa ki rangïalehkai ka Sawmer na ka bynta ban ïakhun tyngeh shuh shuh bad kumjuh ka Nongrim Hills kam shym la kheiñ sting bad haduh kaba kut jong ka kylla step ka Sawmer ka dangtam da shi kol ïa ka liang pyrshah.
Hadien katto katne por ba la bteng ïa ka jingïakhun jong ka kylla miet, ka Nongrim Hills ka la lah ban pynphai kylla lyngba u Cenny Kharnaior ha ka minit kaba 74. Kane ka jingïakhaid ka la pynlong ïa baroh ar tylli kynhun ban ïakhun tyngeh shuh shuh, hynrei haduh kaba kut kim shym la lah ban thep bad ki la hap ban ïasam mar shi point.
Kane ka lympung kan bteng biang haduh ka 23 tarik ha kaba ka Nangkiew Irat SC kan ïakynduh pyrshah ïa ka Laitkor SC ha ka por 2:30 nohphai sngi bad ka Langsning FC ïa ka Nongthymmai SC ha ka por 5:30 janmiet.
