Itanagar, Risaw:
U Biyuram Wahge, uba long u President jong ka seng BJP hapoh ka jylla bad u Myntri ka tnat Health, Family Welfare bad Water Resources, u la kyntu jur ïa ki nongïalam bad ki nongbud jong ka seng, ba kin aiti lut ïalade na ka bynta ban pynskhem bad ban pynkhlaiñ ïa ka seng naduh tynrai.
U la ban jur shuh shuh halor ki jingdonkam na ka bynta ki jingpynkhreh ïa ka ilekshon hapoh ka seng ka ban sa long ha baroh ar kata ha ka jylla bad ha ka ri.
U Wahge u la kren sha ki nongïalam bahakhlieh duh jong ka BJP, kynthup ïa ki ba bun ki Myntri, ki MLA, ki General Secretary, ki heh jong ki Morcha, bad ki President jong ki distrik, ha ka por ba sdang ka jingpyntreikam jong ka jingpynrung dkhot hapoh ka seng ha ki jaka treikam jong ka seng BJP hapoh ka jylla.
U la pynpaw ruh ïa ka jingdonkam jong ki nongbud bad ki nongïalam jong ka seng, da kaba ong, “Ki nongbud jong ka seng jong ngi, ki dei ki thied jong ka seng. Nga sngewkmen ban pynbna ba ka Arunachal Pradesh ka la paw kum ka jylla kaba nyngkong eh ha ka ri ban pynurlong ïa ka thong na ka bynta ka jingpynrung dkhot ha kum kane ka jingpyntreikam tang hapoh ka por kaba lyngkot.”
Kane ka jingjop ka dei ka jingpynpaw ïa ki jingtrei shitom ba la wanrah da ki nongbud bad ki nongïalam jong ka seng jong ngi, bad ngi dei ban pynneh ïa kane ka rukom pyntreikam.
U la pynpaw shuh shuh ba ka seng ka dang pynkhreh ïa ki ilekshon jong ka seng ha kylleng ka ri hynrei u la ban jur ïa ka jingdonkam ban pyndep shwa ïa ki jingdonkam ban pynrung dkhot.
“Man la iwei pa iwei i nongbud jong ka seng ki la dei ban trei shitom khnang ban lah ban pynkhlaiñ ïa ka seng khnang ba ngin lah ban poi bad ïakynduh ïa ki briew kiba don sha ki jaka ba kham jngai, sha ki nongkyndong, ki sor, bad ki jaka sor. Ngi kwah ba baroh kin long shi bynta jong ka jylla jong ngi kaba nangroi bad nangkiew, da kaba pynthikna ba ka roi ka par kan poi sha man la ki kyndong-kynshrot,” la ong u Wahge.
U la kdew ruh ba ka jingpynlong dkhot ka la jan kut, bad ka thong ba la buh da ki heh nongïalam jong ka seng ka la kiew bha, da ka jingkyrshan jong u Myntri Rangbah ka jylla u Pema Khandu, u Symbud Myntri Rangbah u Chown Mein, bad baroh ki nongïalam bad ki nongbud ka seng.
“Mynta ba ngi la sdang ïa ka jingpyntreikam na ka bynta ban pynrung dkhot kaba ïaid shaid-shaid, ngi thmu ban ïoh sa 10,000 ngut ki dkhot, bad ngi ngeit skhem ba ngin sa lah ban pynurlong ïa kane ka thong hashwa ka por ba la buh,” la bynrap shuh shuh u Wahge.
Ha kane ka jingïalang, u Dr. Tangor Tapak, uba long u Convenor jong ka BJP State Sakriya Sadasyata Abhiyan 2024, u Vice President Tapin Siga, General Secretary Tadar Niglar, bad Media Incharge Dolang Tako ruh ki la ai jingkren sha ki briew kiba la wan ban don bynta ha kane ka sngi bad hadien kane ki la ïakren ruh bad ki nongthoh khubor ban ïamir jingmut halor ki kam kiba dang ïaid shakhmat ha kaba ïadei bad ka jingpynrung dkhot hapoh ka seng BJP ha ka jylla.
