Moscow, Risaw:
Ka Yulia Navalnaya, ka kurim jong u heh nongialam ka liang pyrshah jong ka Russia- u Alexei Navalny, ka la pynbna ia ka jing-angnud ban ioh long ka President jong ka Russia lashai-lashisngi hadien ynda la kut ka samoi treikam jong u President ka Russia- u Vladimir Putin. Ha ka jingiakren bad ki nongthoh khubor ka BBC, ka la pynpaw ia ka jingthrang bad jing-angnud ban ïakhun na ka bynta ka hok jong u kurim jong ka bad namar kane, ka la pyntip ba kan ialeh katba lah ban ioh ban mih kum ka kyrtong ka ban ïakhun pyrshah ia u Putin ha ka ilekshon ka ban wan. Ym tang katta, hynrei ka la kut jingmut ruh ba kan shim ki lad- ki kabu ba kan ioh ban pynpulom bad pynpra noh ia ka sorkar jong u Putin.
Wat la katta, la ong ba ia mynta hi, ka dang long kaba eh ia ka wat tang ba kan leit phai biang sha Russia ruh namar ka lah ban shah kem bad shah set patok namar ka jingpyrshah sorkar jong ka bad u kurim jong ka. Namarkata, ka la iathuh ba kan ym leit phai sha Russia katba u Putin u dang don ha ka bor.
U kurim jong ka Yulia, u Alexei Navalny, u la iap ha kti ki bor pynïaid jong ka Russia namar ka jingpyrshah jong u ia ka jing-leit hiar thma ka Russia sha Ukraine. Hynrei, kawei na ki daw-bah ba ka sorkar u Putin ka shun ia utei u nongialam, ka long ba u sei pyrthei ia ki kam ba buhrieh jong ka sorkar Russia haba iadei bad ki kam bam sap bad ia kane u la lah ruh ban sei pyrthei bad ban pynshisha lyngba ka ‘Anti- Corruption Foundation’, kaba la pynlong ia u Putin ba un shun thlong mluh- thlong sying ia utei u nongialam ka liang pyrshah.
Naduh ka por ka jing-iap jong u Navalny, ka Yulia ka la ong ba ki kam saiñ hima-sima hapoh Russia ki la pyniap noh ia ka jingshaniah jong katei ka longiing ha ki bor pynïaid bad ka sorkar jong ka Russia hapoh ka jingialam jong u Vladimir Putin. Kine ki shi kurim ki la don 2 ngut ki khun kiba kynthup ia ka Dasha (23 snem ka rta) bad Zakhar (16 snem).
