New Delhi, Risaw:
U nongrah ktien jong ka India sha Canada, u Sanjay Kumar Verma, u la ong ba dei u Myntri Rangbahduh jong ka Canada hi uba la pynsniew dur ia ka jing-iadei hapdeng ka India bad ka Canada bad u la ong ruh ba ka jing- pharep jong ka Canada ia ka India ba ka iadon bynta ha ka jingleit pyniap ia u lehnoh ka ri Canada ka long tang ban shu pynbud nam ia ka ri India. Namar la ong ba ka Canada ka la kynnoh ba u Verma u iadon bynta ha ka jingphah pyniap ia u lehnoh Khalistan- u Hardeep Singh Nijjar, uba la long u nongshong shnong trai jong ka Canada.
Kumjuh na ka liang jong ka India ka la phah mih mar-mar khlem da ai por ia ki heh jong ka Canada kiba don hapoh India ha katei ka por ba mih ka jingiakynad hapdeng ka Canada bad ka India namar katei ka jingkynnoh jong ka Canada ia ka India ba ka iadon kti ha ka jingleit thombor sha Canada ban shim ia ka jingim jong utei u lehnoh uba la long u nongshong shnong ka Canada hadien ba u la phet bad buhai shnong noh na India.
Kumta, la ong ba ha ka jingiakren bad ki lad pathai khubor ha ka Sngi U Blei, u Verma u la ong ba, haba iadei bad katei ka jingkynnoh jong ka Canada, ka long tang ban pynbud nam ia ka India. Katei ka jingpharep ba khlem nongrim jong u nongialam katei ka ri ka la pynsniew noh syndon ia ka jingiadei hapdeng ka India bad ka Canada hadien ka jingiatrei lang jong ki ha ki snem ba la leit. Namar la ong ba u Justin Trudeau u la kynnoh pyrshah ia ka India halor ka jingpyniap ia utei u lehnoh uba la long u nongshong shnong ka ri Canada bad na ka liang jong utei u nongialam ka ri Canada, u la pyrshah jur ia ka jingshah pyniap jong utei u nongshong shnong ka Canada hapoh u pud- u sam jong ka ri Canada hi, khlem ka jingtip jong ki bor pynïaid jong katei ka ri.
Hynrei haba la kylli bniah bad pan jingpynshai na u halor katei ka jingshah pharep don kti ia u ha katei jingpyniap ia utei u lehnoh ka ri Canada, u Verma u la ong ba um shym la iadon kti badno- badno ruh haba iadei bad katei ka kam bad kam shym don hi ruh kano- kano ka sabut ban pynshisha ia katei ka jingkynnoh madei jong ka Canada. Nalor kata, la ong ba naduh katei hi ka por ba ka Canada ka la pharep ia ka India ba ka don bynta ha ka jingpyniap ia u Nijjar, ka jingiadei hapdeng kine ar tylli ri ka la synjor noh syndon bad baroh ki jingiadei kam ki la kut noh hapdeng jong kitei ar tylli ki ri.
