Nongpoh, Risaw 21
Ki pulit ka Ri Bhoi District ha ka Lah Sngi U Blei ki la ïoh ban kem noh ïa saw ngut ki dkhot seng kiba donkti ban dawa pisa na ki dukan bam jong ki bar jylla ha Ri Bhoi District kum shi bynta ban pynmih pisa na ka bynta ka seng thymmai ka jong ki, kaba tip kyrteng kum Hynñiew-trep National United Front (HNUF).
Tang mar ïa ïoh jingtip halor katei ka jingthmu jong ki dkhot jong katei ka seng, ki pulit ki la pynlong ka jingpynapshrip halor kitei ki kam beaiñ, bad ïoh ban kem markhmat ïa ki lai ngut ki briew kiba la kam ïalade kum ki dkhot jong ka HNUF kiba kynthup ïa u Simon Jyrwa, u Alton Wahlang bad u Francis Wahlang katba ki dang shim pisa na kawei ka dukan bam kaba don marjan bad ka sor Nongpoh ha ka por kumba 2:10 nohphai sngi eiei. Ha ka jingtohkit jong ki pulit, kitei kiba la shah kem ki la phla ba la phah ïa ki ban leh ïa katei ka kam dawa pisa da u Bah Rangsngur Warjri uba la kam ba u dei u President jong ka Meghalaya People Federation (MPF) bad uba bat ruh ha kajuh ka por kum u President jong ka HNUF.
Kumta na ka liang ki pulit khlem da pynslem ki la ïoh ban kem noh ïa u Bah Rangsngur Warjri na ki thaiñ Umsning. Na ka liang jong kitei ki trai dukan bam kiba dei ki bar jylla kim nud satia ban ujor ejahar namar ka jingtieng ïoh kan jia kaei-kaei hadien habud. Namar kata, ki pulit ki la register da ka suo-moto case ha thanat Nongpoh pyrshah ïa kitei ki saw ngut ki nongïalam bad dkhot jong ka MPF bad HNUF bad ka jingtohkit halor kane ka kam ka dang ïaid shakhmat.
