Shillong, Risaw 21
Ka Nongkseh SC ka la bteng ïa ka jingjop kaba ar ha ka lympung ïalehkai SSA First Division Football League 2024, hadien ba ka la pynliem noh ïa ka Mylliem SC da 2-1 kol ha ka Lah Sngi U Blei ha SSA Stadium, Polo.
Kane ka nam jop ka la wan urlong lyngba u kapten u Chesterpaul Lyngdoh uba la thep ha ka minit kaba 36 abd u Imminstar Mawlong (66), katba na ka liang ka Mylliem ka la lah ban pynphai kylla lyngba u Hameshwa Marngar (63) hashwa ba kan mad ïa ka jingshah rem.
Haba phai sha kawei pat ka jingïakhun kaba la long kam hashwa hapdeng ka Umphyrnai SC bad ka Lawsohtun SC ki la ïasam mar shi point hadien ba ki la thep mar 1-1 kol.
Ha kane ka jingïakhun ka Umphyrnai ka la pynkhih jar nyngkong eh lyngba u Arbandelness Khongsni (29), hynrei ka Lawsohtun ka la lah ban pynphai kylla hashwa ban wai lyngba u Kitboklang Pale (90+8) na ka bynta ban ïakhaid mar shi kol.
Ka jingïalehkai ha ka Sngi Ba-ar kan long hapdeng ka Pohkseh SC ïa ka Nongrah SC (11:45AM), katba ka Malki SC ïa ka Sohryngkham SC (2:30 PM).
