Shillong, Risaw 22
Ka North-Eastern Hill University (NEHU) ha ka Sngi Ba-ar, ka la ïasoi ïa ka Memorandum of Understanding (MoU) bad hynñiew tylli ki kynhun kiba na ka ri bad bar ri.
Ïa katei ka jingsoi ïa ka MoU la pynlong ha Golden Jubilee Auditorium, NEICOD building, NEHU, ha ka jingïadonlang u Director ka IIM, Shillong u Prof. D.P. Goyal kum u kongsan. Ïa kine ki soskular (MoU) la soi da u Registrar ka NEHU, u Colonel (retired) Omkar Singh na ka bynta kane ka skulbah.
Lyngba kane ka jingïateh kular la khmih lynti ba kan kyntiew ïa ka jingïatreilang ha kaba ïadei bad ka pule-puthi, ki jingwad bniah ha ka rep ka riang, ki kor teknoloji, ka jingsam mar kylliang ha kaba ïadei bad ka kolshor bad kiwei-kiwei.
Ki MoU ba la ïasoi ki kynthup bad ka Indo-Korea Business Cultural Centre (IKBCC), ka ban sdang ïa ka jingpule ha ka ktien Korean ha NEHU.
Kawei ka MoU kadei bad ka Agricultural Technology Application Research Institute ICAR, Guwahati bad kane ka jingïatreilang kan pynleit jingmut ha ka ban ïaleh lang ïa ka jingwad bniah, ban tei mar kylliang ha kaba ïadei bad ka jingstad bad jingtbit, da ka jingthmu ban tei ïa ka jingmut jingpyrkhat ban thaw ïa ki lad ki lynti ban weng ïa ki jingeh kiba mih ha ka kam rep kam riang bad ban kyntiew ïa ki jaka ha nongkyndong.
Ka MoU bad ka CSRBOX Foundation (SMEC Trust), na ka bynta ban pynbiang ïa ki samla pule ka NEHU ban ïoh jingtip halor ki sap ki phong ha ki karkhana, ban ïohei ïa ka IBM-Certified Program bad ka lad ban ïoh kam.
Ka NEHU ka la pynïar ruh ïa ka jylli treikam ha kaba ïadei bad ka Film & Entertainment Industry lyngba ka MoU bad ka Black Screen Studio Inc., Mumbai. Kane ka jingïatreilang kan thaw ïa ki lad ha ka kam shna phlim, ban ïathuh khana bad kiwei kiba ïadei bad katei ka bynta.
Ka MoU ban ïatreilang bad ka State Cancer Institute, Guwahati Medical College, lyngba kane ka NEHU kan don bynta ha ka ban wad bniah lang ïa ka jingpang Cancer bad ban ai ïa ki jinghikai sha ki samla pule bad ki nonghikai.
Ka NEHU ka la soi ruh ïa ka MoU ban ïatreilang bad ka JETS 24×7, Shillong, ka ban sdang ïa ka jingkamai ki E-Scooter bad E-Rickshaw hapoh ka campus.
Nalor kine ka NEHU kan ïatreilang ruh bad ka TeamLease EdTech, Mumbai, ban pyndap ïa ka jingduna ha kaba ïadei bad ka jingïoh jinghikai hapoh kamra pule bad ki karkhana kiba donkam ban kyntiew ïa ka sap ka phong lyngba ka Digital Education.
U Vice Chancellor ka NEHU, u Prof. Prabha Shankar Shukla ula banjur ïa ka jingkongsan jong ka jingïatreilang ka ban pynriewspah ïa ka jingnang jingstad ïa ka skulbah NEHU bad kan kyntiew ruh ïa ka imlang sahlang baroh kawei.
