Imphal, Risaw:
U Myntri Rangbah jong ka Manipur u N Biren Singh, ha ka jingïalang kaba la long ha ka 20 tarik, Risaw bad ki heh sorkar jong ka tnat PWD, u la ïakren halor ka jingthmu ban pyntreikam ïa ki kam pynroi bad ki projek kiba thymmai. Haba khmih bniah ha ka Microblogging Site X, u Myntri Rangbah u la pyntip shaphang ka ‘jingïakren ka ban wanrah jingmyntoi’ kaba thmu ban kyntiew ïa ka roi ka par bad ban pynneh pynsah ha baroh ar ki bynta kata ha ka thaiñ sor bad thaiñ nongkyndong.
U la thoh hapoh ka rynsan X kumne, “La don ka jingïakren halor ka jingpynmih jingmyntoi halor ka jingpyntreikam hok ïa ki kam pynroi bad kyntiew ïa ka roi ka par bad pynneh pynsah ha baroh ar ki bynta kata ha ka thaiñ sor bad ka thaiñ nongkyndong, katba dang pyrkhat ïa ki projek thymmai kiba dang don ha ka jingpyntreikam.”
Ha kane ka jingïalang la donlang u Myntri ka Public Works Department, Youth Affairs & Sports, u Govindas Konthoujam bad u Chief Secretary, u Dr. Vineet Joshi ha New Delhi. Hashwa kane, u Myntri Rangbah ha ka 18 tarik, Risaw u la pynskhem biang ïa ka jingangnud jong u ban pynïaid shakhmat ïa ka jingthmu jong u Myntri Rangbahduh u Narendra Modi halor ka jingïohijngai na ka bynta ka thaiñ Shatei-Mihngi na ka bynta ki jingpynkylla ha ka por ba la don ka jingïalang bad u Myntri ka sorkar kmie jong Parliamentary and Minority Affairs u Kiren Rijiju bad u Myntri Rangbah jong ka Arunachal Pradesh u Pema Khandu.
