Shillong, Risaw 22
Ki nongïalam bad dkhot ka Hynñiewtrep Integrated Territorial Organisation (HITO) ha ryngkat bad ka Jaiñtia Women Council ha ka Sngi Ba-ar ka 22 tarik u Risaw 2024, ki la leit ban tur kynsan sha ka ophis treikam jong ka Meghalaya State Pollution Control Board (MSPCB) ha Lumpyngngad ban dawa pynlong biang ïa ka jingïalang pynsngewthuh paidbah ne ka ‘Public hearing’ ha Wahïajer Narpuh, East Jaiñtia Hills District.
Kum ban shu kdew, ka MSPCB ka la khot ban pynlong ïa ka ‘Public hearing’ hadien ka jingpan jingbit jong ka Meghatop Cement Pvt Limited ha ka 18 tarik u Risaw 2024, na ka bynta ban tei ïa ka karkhana pynmih dewbilat (Integrated Cement Plant of capacity 3.3 MTPA Clinker, 2.8 MTPA Cement bad 16MW Waste Heat Recovery System) hapoh ka shnong Wahiajer Narpuh, East Jaiñtia Hills District. Hynrei la sakhi ba ha katei ka jingïalang paidbah kaba pynlong ha katei ka sngi ki la mih ki jingïapynibor hapdeng ki paidbah kiba ai jingkyrshan ban tei ïa ka karkhana bad kiba pyrshah ha kaba na ka liang ki paidbah kiba kyrshan ki khlem ailad satia ïa ki paidbah kiba pyrshah ban rung shapoh ka jingïalang ha kaba ki pynkhreh da ki dieng-ki siej ban tied bad bom naphang ïa ki briew kiba wan ban pyrshah ha ka jingïalang.
Na ka liang ka seng ka la ong ba kane ka jingbym ailad ïa ki paidbah ban pynpaw ïa ki jingpynsngew jong ki ha katei ka jingïalang, ka long kaei-kaei kaba ym ïahap satia ha kaba ka tarajur ka la noh shiliang sha kawei ka kynhun.
Ha kane ka jingleit tur kynsan jong ka seng, la ïohi ïa ka jingsyrtap jong ki pulit kiba la khanglad ïa ka seng ba kin tur palat ïa ka khyrdop jong ka MSPCB hynrei ka dei tad hadien ba na ka liang ki Majistor bad ki nongpynïaid ka Board ki la wan ban ïakren bad ki dkhot jong kine ki seng ba kin sa ailad ban rung shapoh ka ophis ha kaba la ailad ruh tang hynriew ngut ki nongïalam ban leit ban ïakynduh ïa u Member Secretary jong ka MSPCB, u Dr GH Chyrmang, MFS.
