Mawkyrwat, Risaw 22
Ka Ïawpaw FC ka lah ban pynliem noh ïa ka Thongni Brothers FC lyngba ka tie-breaker da 6-5 kol ha ka Golden Jubilee Football Tournament 2024 ba la pynïaid da ka Nonglang Sports Club ha ka sngi Saitjaiñ ha madan Pyndenïewlyngdoh, Nonglang, South West Khasi Hills District.
Haba phai sha katei ka jingïalehkai hapdeng kitei ki ar tylli ki kynhun ka la long kaba ïakhaid bha bad baroh artylli ki kynhun ha ka kylla step kim shym la lah ban pynkhih jar. Ha ka kylla miet ka jinglehkai ka la kham itynad bad ka Ïawpaw FC ka la pynkhih jar nyngkong ha ka minit kaba 60 lyngba Peter Lamare. Hadien katto katne por ka Thongni Brothers ka la lah ban pynphai kylla lyngba u Pynshonhdor Thongni ha ka minit kaba 72 na ka bynta ban ïakhaid mar 1-1 kol.
Ka jingïalehkai ka la nang khluit ha kaba baroh artylli ki kynhun ki la ïakhun dohïap ban rah ïa ka nam jop .Dei ha ka miet kaba 76 ba ka Thongni Brothers ka la sdang ban duh mynsiem hadien ba u Khrawbok Thongni u la ïohpdiang da ka red card hadien ba u la kum bakla pynur ïa u rangïalehkai ka Ïawpaw FC. Haduh kaba kut ki 90 minit ka jingïalehkai ka la poi sha ka jingïakhaid mar shi kol.
Haba phai sha ka jingïashut tie-breaker ka Ïawpaw FC ka la lah ban pynrung haduh 6 tylli ki kol, katba ka Thongni Brothers ka la thep tang 5 kol. Ïa ka khusnam Man of the Match la khur da u Robert Rymbai na ka Ïawpaw FC ha kaba la sam da u Bah A.B Shylla uwei na ki riew Rangbah ka dong ka thaiñ.
Na ka liang ka Nonglang SC ka la pyntip ruh ba ka jingïalehkai ha ka 23 tarik kan long hapdeng ka Rangjadong SC pyrshah ïa ka Rangkhraw FC.
