Shillong, Risaw 22
Ka Mawreng Jr. Academy ka la pynliem noh ïa ka Laitryngew SC da 2-0 kol na ka bynta ban ïoh rung sha ka semi final ha ka lympung ïalehkai U-14 Football Tournament 2024 ba la pynïaid da ka Maraikaphon Youth Club ha ka sngi Ba-ar.
Kane ka nam jop ka la wan urlong lyngba u Greyterrichson Rani bad u Borntius Dkhar.
Ha kane ka jingïakhun quarter final kaba lai ba la long ha madan Maraikaphon, Sohra baroh ar kynhun ki la pyrshang ban ïakhun tyngeh naduh kaba sdang. Ka Mawreng ka la pynkhih jar nyngkong eh lyngba u Greyterrichson ha ka minit ba 10. Tang hadien katto katne por kane ka kynhun ka la thep biang sa shi kol lyngba u Borntius ha ka minit ba 23.
Wat la ka Laitryngew ka la ïakhun tyngeh, hynrei haduh kaba kut ka jingïalehkai kam shym la lah ban pynphai bad mad ïa ka jingshah rem.
Ka jingïakhun quarter final kaba khatduh kan long ha ka Sngi Balang hapdeng ka 16 Bros pyrshah ïa ka MYC ‘A’ ha ka por 3:15 janmiet.
