Shillong, Risaw 22
U kyrtong ka Bharatiya Janata Party (BJP) u ban ïa aireng ha ka ilekshon shiteng samoi na Gambegre konstitwensi bad MDC ka Tura, u Bernard N. Marak u la ban jur ba ka ilekshon ha kane ka kynti kan dei na bynta ka synshar-khadar kaba khuid-suba bad ka ban pynkut noh ïa ka bamsap.
“Ka BJP kan ïakhun ïa ka ilekshon shiteng samoi na bynta ka synshar-khadar kaba khuid-suba, ban pynkup bor ïa ki paid nongkyndong bad ban pynkut noh ïa ka bamsap kaba la pynjynjar ïa ka jingim ki paidbah,” ong u Marak ha ka kyrwoh khubor.
Haba kdew ba ki paidbah ka Gambegre kin hap jied hapdeng ka bamsap bad ka jingsynshar kaba khuid- suba, u la ong, “Ka jinglong ba sahdien bad ka jinglah ban roi ban kiew, bad ban kyrshan ïa ki lanot ha ka imlang-sahlang ne ban jop ïa ki jingeh baroh bad ban long kiba lah ban pyndap-pynbiang ïalade.”
Ha kajuh ka por, u la ong ba ki briew ba lui-lui bad ba duna ka ïoh ka kot jong ka Gambegre konstitwensi ki la long ki lanot ha ka synshar bamsap – kaba la khang ïa ki lad jingïarap Sorkar sha ki paidbah bad pynkynriah pat ïa ka roi ka par sha kiwei pat ki jaka.
“Ka ilekshon shiteng samoi ha Gambegre kan long ka jingïakhun kaba itynnad bha bad baroh kito kiba la shah pynduh ïa ki hok jong ki ha ki nongïalam jong ka Sorkar ba mynta khlem artatien kin jied ïa ka BJP. Ki nongthep ‘vote’ ka Gambegre kin sa ai ïa ka rai ha ka 13 tarik u Naiwieng bad nga ngeit ba kin jied ïa ka roi ka par ban ïa ka bamsap,” u la ong da kaba bynrap ba ka jingïakhun kan long pyrshah ïa ka kurim u Myntri Rangbah (ba mynta), ka para kynsi u Myntri Rangbah barim, u kyrtong jong u MP ba mynta bad ka BJP ka ban sdang naduh tynrai ban ïalap na bynta ki jingkylla ba bha.
U Marak haba pynsngew ba ka Gambegre ka dei ka konstitwensi ‘riewlum bad kan long kaba kham jwat, ha kawei ka liang, u la ong ba katkum ka jingïaid lynti bad ki kam ba ka seng ka la leh, kan sa ai ïa ki jingkheiñ kiba itynnad pyrshah ïa ki radbah saiñ pyrthei kiba la synshar ïa ka konstitwensi ha ki por ba la leit.
“Ka thong jong ngi na bynta ka Gambegre ka long ban pynkylla ïa kane ka konstitwensi sha ka konstitwensi kaba kyrshan ïa ka roi ka par ym kum ka konstitwensi kaba dang duna ha ki kam pynroi,” u la ong.
Shuh shuh u la bynrap, “Ka Sorkar ba mynta bad kaba ha shuwa ki la pynduh ïa ki paidbah Gambegre ïa ki jingdonkam ba kongsan kum ka um, ka ïing ka sem, ka kam ka jam, ‘Card’ rashon bad mynta – ka bai bording kaba rem dor kaba la buh jingeh shi kat dei ïa ki nongshong shnong ba duna ka ïoh ka kot bad kaba la pynshitom ïa ki miet bad sngi.”
Nalor kane, u Marak uba long ruh u Vice-President ka BJP, u la ong ba un sa shimkhia haba ïadei bad ki jingbym biang ha ka liang ka NREGA, JJM, PMGSY, PMAY, IHHL, NRLM, ka baibam tymmen, ba ïap lok, bad kiba duna dkhot met.
