Khliehriat, Risaw 23
Ka Ïatyllilang SC Hingaria ka la ïoh jingjop, katba ka Mukhaïalong SCSC bad ka Shilliang Umshong ki la ïasam mar shi point ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA).
Ha ka jingïalehkai kaba nyngkong kaba la long ha madan Diengshynrum, Khliehriat ha ka Sngi Balang, ka Ïatyllilang SC Hingaria ka la pynliem noh ïa ka Pamrakmai SCSC da 3-1 kol.
Ha kane ka jingïakhun ka Pamrakmai ka la pynkhih jar nyngkong na ka daw ka jingbakla thep hi da u rangïalehkai ka liang pyrshah u Arwi Pohti ha ka minit kaba 18. Hynrei ka Ïatyllilang SC Hingaria ka la lah ban pynïakhaid kylla lyngba u Joshwa Surong ha ka minit kaba 25.
Hadien katto katne por ka Ïatyllilang ka la thep biang ïa ka kol kaba ar lyngba u Senchet Lamin ha ka minit kaba 44 bad ïa kawei pat ka la thep ha ka kylla miet lyngba u Filter Lapasam ha ka minit kaba 76 na ka bynta ban jop syndon.
Haba phai sha kawei pat ka jingïakhun kaba ar hapdeng ka Mukhaïalong SCSC bad ka Shilliang Umshong SC ki la ïakhaid mar 1-1 kol. Ka Mukhaïalong ka la pynkhih jar nyngkong lyngba u Fairme Kyndait ha ka minit kba 17, hynrei ka Shilliang Umshong ka la lah ban pynïakhaid kylla lyngba u Hemanjoi Khongsai ha ka minit kaba 43.
Kane ka lympung kan bteng biang ha ka 25 tarik hapdeng ka Khliehriat West pyrshah ïa ka Wahïajer Narpuh ha ka por 12 baje mynsngi, katba ka Diengshynrum ïa ka Byndihati ha ka por 2:30 nohphai sngi.
