Shillong, Risaw 23
Haduh saw ngut ki nongkhaïi drok bar jylla ba kynthup ïa lai ngut ki kynthei ki la shah kem noh ha ki pulit ka Anti Narcotics Task Force (ANTF) ka East Khasi Hills na ka thaiñ Umsohsun ha ka janmiet jong ka 22 tarik mynta u bnai.
Kine saw ngut nongkhaïi drok kiba la shah kem ki dei ba la tip kyrteng kum u Suraj Masih 26 snem, ka Altima Khatun 27 snem, ka Gulasha Begum 30 snem bad ka Jumila Khatun 28 snem.
Na ka met jong kine ki briew, ki pulit ANTF ki la ïoh ban kurup ar tylli ki synduk thep sabon, ha kaba la thep bha ïa u drok ba la suba u heroin uba don ka jingkhia haduh 19.4 gram, san tylli ki mobile phone bad ka pisa T.81,610.
Hadien kane ka jingïoh kem, na ka liang jong ki pulit ki la pynrung mukotduma ïa kine ki briew ha thanat Sadar hapoh ki kyndon jong ka NDPS Act.
