Tura, Risaw 23
Ka kyrtong ka AITC, ka Sadhiarani M. Sangma ha ka Sngi Balang ka la thep kyrteng na bynta ka ilekshon shiteng samoi ka ban sa long ha Gambegre hakhmat u Returning Officer (RO) ha sor Tura.
La synran ïa ka da u kurim jong ka, u Zenith Sangma lem bad u Myntri Rangbah barim ka Jylla, u Dr. Mukul Sangma ha ryngkat bad ki paidbah nongkyrshan. Ka jingdon jong ki kyrtong kiba la thep kyrteng ka la poi sha ka 3 ngut lem bad uwei u kyrtong shimet, u Jerry A. Sangma uba la thep kyrteng lang ha kane ka sngi.
Haba kren hadien ka jingthep kyrteng, ka Sadhiarani kaba dei ruh ka MDC ka la pynpaw ka jingkyrmen skhem ban jop wat hapdeng ki jingeh kiba ka seng ka ïakynduh. Ka ngeit ba ka jingïakhun jong ka kan long bad ka kyrtong ka NPP, ka Mehtab Chandee Sangma, kurim u Myntri Rangbah ka Jylla, u Conrad Sangma.
“Nga kyrmen skhem namar ba ki paidbah ka Gambegre ki ieid ïa nga, kin ym iehnoh ïa nga bad kin ‘vote’ na bynta jong nga. Ka NPP ka pyrshang katba lah hynrei ka pyndonkam bakla ïa ki jingdon-jingem Sorkar. Kiba bun na ki paidbah ha Gambegre ki dei kiba duna ka ïoh ka kot bad ka NPP ka shim kabu ïa ka jingduk jong ki. Ki sam ïa ki tin sop ïing CGI, ka pisa, kum ka jingpyrshang kaba tyngeh ban ïoh ïa ki ‘vote’,” ong ka Sadhiarani.
Kane ka dei ka jingïakhun kaba lai na bynta ka kyrtong ka AITC, ha kaba ka la shah rem noh ha ka jingïakhun kaba ïakhaid bad u Saleng ha u snem 2018, katba u Saleng u la ïoh ïa ka jingjop kaba suk ha u snem 2023.
Hynrei ka ngeit skhem ba ka jingïakhun mynta ka kynti kan long tang hapdeng jong ka bad ka NPP naba bun na ki nongïalam ka Congress ki don ryngkat bad ka.
“Ka jingïakhun kam dei bad u Saleng ne ka Congress, hynrei bad ka NPP”, ka la bynrap.
Halor ki jingeh ba ki paidbah ki ïakynduh, ka Sadhiarani ka la pynpaw ba ka mat kaba hakhmat eh ka dei halor ki lad pynïasoh lyngba ki surok.
“Lada nga shah jied ngan trei tikna na bynta ki lad pynïasoh lyngba ki surok. Shuh shuh, kiba bun ki paidbah jong ka konstitwensi ki dei kiba duna ka ïoh ka kot bad ki donkam jingkyrshan ha ka kamai-kajih jong ki. Ngan pyntikna ïa ka jingkyrshan sha ki lada shah jied. Nga la leit sha kiba bun ki ïing hapoh konstitwensi. Ki dang don bun tylli ki mat kiba ka Gambegre ka ïakynduh bad kiba hap ban shim khia,” ka la bynrap.
Haba ban biang ba ka jingthmu ba hakhmat eh jong ka, ka long ki surok namar kumba 50% na ka konstitwensi ka duna ïa ki surok kiba biang, ka la ong ba kane ka la ktah lut ïa baroh kynthup ha ka liang ki jingjia ba kyrkieh, ki nongrep bad kiwei-kiwei.
Katkum ki tyllong khubor, la ong ba lashai ka sngi, baroh ar ngut ki kyrtong u Jingjang Marak na ka Congress bad NPP kin sa leit ban thep kyrteng.
Shuh shuh u Bernard Marak jong ka BJP lem bad 2 ngut kiwei pat ki kyrtong shimet, ki lah ban leit thep ïa ki kyrteng jong ki watla ym pat tip tikna ha kano ka sngi. Ki tyllong khubor na ka thaiñ ki ïathuh ba ka jingïakhun ha kane ka konsitnwensi kan long kaba ïakhaid bha.
Ha kawei ka liang u nongïalam ka All India Trinamool Congress (AITC), Dr. Mukul Sangma u la pynpaw ka jingkyrmen skhem ba ka seng kan sa poi sha ka thong ha ka ilekshon shiteng samoi ka ban sa long shen ha Gambegre.
“Nga la ïohi ïa ka jingieid jong ki paidbah na bynta ka kyrtong jong ngi. Ka jingangnud jong ki paidbah lah ban sngewthuh ruh ha ka khana jong ka Jylla baroh kawei. Ka don ka jingthrang ban weng ïa ka Sorkar kaba mynta – ka NPP – BJP ba ïadon lang. Ka Sorkar ka la buhrieh ïalade ban pynbiej ïa ki briew bad ka la don bynta ha ki jingbym biang kiba la paw ha kylleng,” ong u Dr. Mukul haba kren sha ki lad pathai khubor.
U Dr. Mukul u la bynrap ba ka la don ka jingbitar hapdeng ki samla namar ka jingbym don ki lad ki lynti la ka long ha ka Sorkar ne ki tnad shimet.
“Ha kine ki snem, phi la ïohi ïa ka jingthaw ïa ki kam thymmai? Katno ngut kiba la pyndep ïa ka jingpule bad kiba ap da ki snem, ki shong khlem kam? Klet noh ïa ki kam thymmai, wat na ka bynta ki kam kiba la don lypa, ka Sorkar ba mynta ka la pynduh ïa ki paidbah ïa kine ki kam,” la pynskhem u Dr. Mukul.
Haba kynthoh ïa u Myntri Rangbah ka Jylla, u Conrad Sangma halor ka jingkren kaba la kynnoh ba u la kren ha ka por ïalap ilekshon, une u nongïalam ka AITC u la ong “U Myntri Rangbah u la ong ba ki briew ki dei ban jied ïa ka seng kaba synshar lym kumta kin ïoh tang ïa ki skhim MLA ha jaka jong ka roi ka par. Ka mut aïu kane? Hato um sngewthuh ïa ka jingkitkhlieh jong u kum u Myntri Rangbah? Ka hok ban ïoh ïa ka lad kaba mar katjuh ka dei ka hok ba kongsan. Hato u lah ban khang lad ïa kiba kum kine ki skhim ban poi sha ki paidbah? Kumno pat ka JJM bad MGNREGA? Ka JJM ka long kaba la leh torti, hynrei ka dei ka skhim kaba la pyntikna na bynta ki paidbah. Hato u lah ban pynsangeh ïa kane?”, la buh jingkylli u Dr. Mukul.
“Ka Sorkar Jylla kam don skhim na ka bynta ki paidbah. Dei namar ba ka Jylla kam don pisa, kim pyndap wat ïa ki kam ba lait kiba la thaw. Ka Sorkar mynta ka shim kylliang na man la ki jaka – ka ïew (open market), ki jaka kynshew bad na man la ki jaka ba ka lah ban pyndap pynbiang,” ong u Myntri Rangbah barim da kaba kdew ruh ïa ka kaiphod u CAG kaba la ong ba ka jingkit ram jong ka Meghalaya ka long kaba shyrkhei.
Na ka liang utei u nongïalam, u la pynpaw ruh ka jingkyrmen skhem ba ka seng jong u kan sa ïoh ïa ka jingjop ha kane ka ilekshon shiteng samoi.
