Shillong, Risaw 23
Ka hat-trick ba la ïoh da u Ksanmiïaki Thabah ka la biang pura ïa ka Maraikaphon Youth Club ‘A’ ban long sa kawei pat ka kynhun kaba la lah ban pynthikna ban jam sha ka semi final ha ka lympung ïalehkai U-14 Football Tournament 2024 ba la pynïaid da ka Maraikaphon Youth Club ha ka sngi Balang.
Kane ka la wan urlong hadien ba ka la lah ban pynliem noh ïa ka 16 Bros da 3-1 kol ha ka jingïakhun quarter final kaba la long ha madan Maraikaphon, Sohra.
Ha kane ka jingïakhun u Ksanmiïaki u la ïoh ban thep marwei ha ka minit kaba 18, 23 & 49, hynrei ka 16 Bros ka la lah ban pynphai kylla shi kol lyngba u Phiraiaki Chyne ha ka minit ba 65 ha shwa ba kan mad ïa ka jingshah rem.
Nalor ka MYC ‘A’, kiwei pat ki kynhun kiba la rung sha ka semi final ki long ka Mawkma Football Club, Mawreng Junior Academy bad ka Seng Samla Mawmluh.
Kumta na ka liang ki bor pynïaid ki la rai ban pynïakhun da ar tylli ki semi final, kata ka semi final (1st leg) kan long hapoh ka Mawkma FC pyrshah ïa ka Mawreng Junior Academy ha ka 25 tarik mynta u bnai bad ka Seng Samla Mawmluh pyrshah ïa ka Maraikaphon Youth Club ha ka 26 tarik. Katba semi final (2nd leg) kan long hapdeng ka Mawkma FC ïa ka Mawreng Junior Academy ha ka 29 tarik bad ha ka 30 tarik ka Seng Samla Mawmluh pyrshah ïa ka Maraikaphon Youth Club. Katba ïa ka final la buh ban pynlong ha ka 9 tarik u Naiwieng. Kine baroh ki jingïakhun kin long ha ka por 3:25 janmiet.
