Shillong, Risaw 23
Ka Laitkor SC kaba dang shu kiew kyrdan thymmai ka la ïoh jingjop ba nyngkong ha ka Shillong Premier League 2024 hadien ba ka la pynliem noh ïa ka Nangkiew Irat SC da 2-0 kol, katba ka Langsning FC ka la wanphai da ka jingjop ha ka Sngi Balang ha SSA Stadium kaba ha First Ground, Polo.
Baroh saw tylli ki kynhun kiba ïashim bynta mynta ka sngi hadien ka jingshah rem ha ka jingïalehkai kaba nyngkong. Kawei kaba pyndiaw ïa ka Laitkor ka long ba ha ka jingïalehkai kaba nyngkong kam shym la ïoh ban ïalehkai na ka daw ba kam pat shym la lah ban pyndep ïa ka jingrung kyrteng ïa ki rangïalehkai shwa ïa ka por.
Kumta ha kane ka jingïakhun ka la lah ban pynliem ïa ka kynhun jong shiphew ngut ki rangïalehkai ka Nangkiew Irat lyngba u Fridison Wanniang uba la ïoh thep kol ha ka mint kaba 60 bad u Banskhem Kharkongor (90’+1).
Ka Laitkor ka la bat ïa kiba bun ki rangïalehkai kiba la pynlong ïa ki ban kiew kyrdan na ka First Division ha ka samoi ba la dep, katba ka Nangkiew Irat ka la wanrah da ki katto katne ki rangïalehkai kiba la kham tbit ban ïalehkai ha kane ka kyrdan.
Ha ki shiteng kynta ka Laitkor ka la ïakynduh jingeh ban thep kol, hynrei dei ha ka kylla miet ba ka la lah ban pynurlong ïa ka jingjop.
Haba phai sha kawei pat ka jingïakhun, ka Langsning FC ka la pynliem noh ïa ka Nongthymmai SC da 3-2 kol.
Ha kane ka jingïakhun u Michaelson Kurbah u la pynkhih jar nyngkong eh na ka bynta ka Nongthymmai ha ka minit kaba 20, hynrei hashwa ban kut ka kylla step ka Langsning ka la lah ban pynïakhaid kylla lyngba u Laldanmawia (40).
Hadien 2 minit ba la bteng ïa ka jingïakhun jong ka kylla miet, ka Langsning ka la thep biang ïa ka kol kaba ar lyngba u Dajiedlang Wanshnong (47′), hynrei tang ha ka minit kaba 61 ka Nongthymmai ka la pynïakhaid biang lyngba ka penalty ba la shut da u Ronald Singh Shaikhom (61).
Ha shwa ban wai ka Langsning ka la thep biang ïa ka kol kaba lai bad kaba khatduh lyngba u John Lalrinawma (90+1), hadien ba u rangapkol ka liang pyrshah um shym la lah ban kyrda na ka jingshah thep.
Ka jingïalehkai ha ka Sngi Palei kan long hapdeng ka Rangdajied United FC pyrshah ïa ka Shillong Lajong FC ha ka por 2:30, katba ka Ryntih FC ïa ka Mawlai FC ha ka por 5:30 janmiet.
