Shillong, Risaw 23
Ka Sports Authority of India, STC, Shillong kan pynlong ïa ka prokram jied khynnah ïalehkai (shynrang bad kynthei) ha ka Archery, Boxing, Judo bad Karate na ka bynta ka residential & non-residential scheme, ha u Naiwieng mynta u snem hapoh katei ka shlem ai jinghikai kaba don ha NEHU.
Ïa ka Archery (Residential for both Boys & Girls, Non Residential Scheme for Girls only) yn pynlong ha ka 7 bad 8 tarik. Na ka bynta ka Boxing, Karate bad Judo, kiba hap hapoh ka Residential Scheme (Boys & Girls) yn pynlong ha ka 8 bad 9 tarik u Naiwieng.
Kat kum ka kyrwoh ba la pyllait da u T.S.Chavhan, Deputy Director ka SAI, STC, Shillong, la ong ba ka rta jong ki khynnah ka dei ban long naduh 12 haduh 18 snem ka rta. Ka jingjied ïa ki khynnah ïalehkai kan long katkum ka jinglah ban pynpaw ïa ka jingtbit ha ki lympung ïalehkai ba la ïoh jingithuh ha ki Inter National, National, State bad District Level. Yn bishar bniah lyngba ki test katkum ka rta. La bthah ruh ïa ki khynnah ba ki dei ban wanrah lang ïa ar tylli ki dur passport size ba dang shu dep shon shen ryngkat ka Aaddhar card, ki kot ki sla ki ban pynshisha ïa ka snem kha.
