U Nongsaiñ Hima,1969
Ka jingthmu bakongsan jong kano kano ka jingsynshar ka long ban wanlam ki jingmyntoi kiba kynsai tam na ka bynta u babun u balang ong uwei u ‘riew pyrkhat ba pawkhmat uba kyrteng u Bentham, (the greatest good for the greatest number). Kano kano ka jingsynshar ka bym lah ban wanlam ne pyntreikam ïa katei ka jingthmu kam long ka jingsynshar.
Ha ka district jong ngi, ngi don ki syiem, ki lyngdoh bad kumta ter ter, nangta pat ngi don sa ka district council halor hangta ngi don sa ka sorkar Assam. Tip ynda wan sa kata ka autonomous state ngin hap sa ha kata. Kumta la bun ki nongsynshar bad ngim tip ha duh katno ngin lah ban ioh ïa ki jingmyntoi, hynrei kaba shai kdar ka long ba khlem pep yn mih ki jyrwit jyrwat namar la da kawei ka shaka kaba ïaid halor kawei kim ia trei sngewthuh lang, khlem pep kata ka kor kan sangeh bad yn lut por sa tang ha ka shna ka pynbeit.
Ka jingkylli kaba mih mynta ka long la ki syiem, ki lyngdoh, wahdadar bad kumta ter ter kin dang dei ban sah ne la dei ka por ba kin leit noh. Kane ka long ka jingkylli kaba mih na man la ka shyntur ki briew. Ka jingsah jong ki syiem, ki lyngdoh etc kan shong shibun ha ka jingmon u paidbah.
Katba ki syiem etc ki dang sah hato kam long kaba dei ban kyntu bad kyrpham ïa ki ha ka liang ka synshar ka khadar ban ym don ka leh shi liang, ban ym don ka leh mon bad ka leh donbor ? Ym la dei ban ïarap ïa ki ban kdew sha kiba ka jingsuk u khun u hajar ka shong ha ki kti jong ki bad ka jingsuk u khun u hajar ka long ka jingsuk jong ka hima bad ka long ka burom ïa u Syiem u Kpa ? Haba u khun u hajar u duk u thngan, tang ha ka pang, ban ioh um dih ruh um ioh, hato ym dei u Syiem uba hap bah khala ïa ka suk ka saiñ jong u khun u hajar jong ka hima ?
Namarkata ka long kaba donkam eh ba ki Syiem etc kin pynïaid bha ïa la ka hima ban peit ha ki kam pynroi pynsan ki trei kam, ki skul ki ïaid beit, ka um dih ka um bam ioh kyrhai bad lait na ka thngan ka jingit bad dei da kaba ki leh kumne kan sah ka nam, yn pyrto u khynah u khunlung bad ka kup shiliang ka sem shiliang.
Kumta ka hima kaba la pynïaid bha ka long ka hima kaba suk bha ha kaba u syiem u peit u jngoh ïa ka jingbit jong u khun u hajar, u don ka jingkheiñ jingdiah ïa ka ioh ak lut, ki khun ki har ki lait ruh na ka kiew ïing lieh ïing saw ha ki kam khyndew kam khlaw bad ha kiwei kiwei ruh ki lang. Don ki hima kiba rit kiba ym don jingmih ei ei, la dei ban kyrshan ïa ki ba kin lait na ka jingshitom pisa bad ba kin ym hap ha ka jingpynshoi ban pynmih tyngka na ka bynta ka hima ha ki rukom ki ba ym ïahap. La dei ruh ba ki Syiem kin don ka jingiasngewthuh jingmut para ma ki ban lait na ka shah leh thombor leh donbor na kiwei pat ki bor.
Dei da kaba leh kumne ki tei mot hi ïalade ha ka dohnud ki khun ki hajar bad sah pyrto junom.
