Shillong, Risaw 25
Ka skhim Pradhan Mantri Gram Sadak Yojana (PMGSY) ka dei kawei na ki skhim jong ka Sorkar Pdeng kaba la ai jingmyntoi shisha ïa ki shnong ha nongkyndong ban ïoh surok. Wat lada bun ki shnong ki la ïoh surok, hynrei ha Meghalaya ki dang don sa kumba 1,000 tylli ki shnong kiba ym pat ïoh surok haduh mynta.
Ka Sorkar Pdeng mynta ka dang pyntreikam ïa ka PMGSY-III ha kaba ka tnat pynroi nongkyndong ka Sorkar Pdeng ka la mang 88 tylli ki surok kumba 782.155 km bad 55 tylli ki jingkieng hapoh ka PMGSY-III, ha ka jingmang pisa kaba T. 1,056.82 klur ïa ka jylla Meghalaya.
La mang ruh 55 tylli ki surok kumba 443.26 km ha ka jingbei pisa kaba T. 412.34 klur ha ka Jylla hapoh ka PMGSY-III.
Kane ka dei ka sienjam jong ka Sorkar Pdeng ka long ban pynkhlaiñ ïa ki lad jingpynïasoh ha ka leit ka wan ha thaiñ nongkyndong bad ban pynkiew sted ïa ka jingkiew ka ïoh ka kot ha ka Thaiñ Shatei Lam Mihngi.
Kane ka sienjam ka long ban kham pynbiang ka jingshakri ha kaba ïadei bad ki lad ai jingsumar, ka pule puthi bad pynïasoh ïa ki shnong bad ki jaka ïew, nalor ka leit ka wan ha ki jaka nongkyndong ka ban kham weng ïa ka jingïapher hapdeng ki shnong nongkyndong bad ki jaka sor bad plielad ïa ka lad kamai kajih ha ka thaiñ.
Nalor ka skhim PMGSY-III, ka sorkar Jylla ka la pynkhreh ruh ïa kawei ka skhim kaba tip kum ka Chief Minister’s Rural Connectivity Programme (CMRCP) na ka bynta ban pynpoi surok sha ki shnong ki bym pat ïoh surok.
U Mantri Rangbah, u Conrad K Sangma u la pynbna ba lyngba kane ka skhim, yn buhthong ban pynpoi surok bad shna jingkieng ban pynïasoh ïa ki shnong ki bym pat ïoh surok.
