Shillong, Risaw 25
Ha kawei ka jingjia kaba hap ban shim ïa ka sienjam kaba kyrkieh, ka liengsuiñ SpiceJet (SEJ2448) kaba mih na Delhi ban wan sha kad liengsuiñ Umroi ha ka Sngi Thohdieng ka la hap ban hiar kyrkieh ha kad liengsuiñ Guwahati – Lokapriya Gopinath Bordoloi International Airport (LGBI) namar ka jingshah byrngem buh ‘bomb’-kaba hadien la pyntikna ba ka dei kaba thok.
Kane ka jingshah byrngem buh ‘bomb’ ka dei ka jingjia kaba hynriew kaba la thmu ïa ki liengsuiñ SpiceJet ha kine ki khyndiat sngi ba la dep – katba ka ri ka mad ïa ka jingeh haba phai sha ka jingnang kiew jong kiba kum kine ki jingjia ha kaba ki la don palat 250 tylli kiba kum kine ki jingshah byrngem, ha kawei ka liang kaba la pynthut ïa ka jingtreikam ki liengsuiñ ha kylleng ka ri.
Kane ka jingjia ka la jia ha ka por ba ka liengsuiñ SpiceJet, kaba kit ïa 75 ngut ki nongleit-nongwan ka la jan poi ha kad liengsuiñ Umroi, ha kaba ka la wan ka jingpynbna haba ïadei bad ka jingshah byrngem buh ‘bomb’.
Mar kumta hi, ki nongtrei liengsuiñ ki la pynkylla lynti noh ïa ka liengsuiñ sha Guwahati, ka kad liengsuiñ kaba jan tam kaba la khreh bad biang na bynta kum kine ki jingjia ba kyrkieh. Hadien ba la hiar khyndew, la pynkynriah noh mar-mar ïa ka liengsuiñ sha ka bynta kaba shngaiñ jong ka ‘Tarmac’, bad ki bor pahara ki la pynlong ïa ka jingpynkhuid kaba janai khnang ban pyntikna ïa ka jingshngaiñ jong ki nongleit-nongwan.
Ki bor pynïaid liengsuiñ bad kad liengsuiñ ki la khmih bniah mardor ïa kane, da kaba buh hakhmat eh ïa ka jingshngaiñ jong ki nongleit-nongwan bad ki nongtrei, kiba baroh ki la hiar na ka liengsuiñ khlem kano-kano ka jingmynsaw.
Ka jingtohkit ka dang ïaid shakhmat, bad na ka liang ka SpiceJet ka la pynlong ïa ka jingtohkit hapoh jong ka bad khmih ïa ki lad jingpynbeit ban pynpoi suk poi saiñ ïa ki nongleit-nongwan sha ka jaka ba ki thmu ban poi.
Na ka liang ki heh ophisar ki la ong ba kane ka jingsaphriang khubor jong ki jingbyrngem thok-khamtam kiba la ïohpdiang lyngba ka ‘Email’-ka la ïalam sha ka jingpynslem kaba jur, ka jingpynmih ïa ki kyndon ba kyrkieh, bad buh jingeh ruh halor ki jingdon-jingem ka tnad liengsuiñ ha kylleng ka ri.
Shuh shuh nalor kane, ki bor ba dei khmih ki dang bteng ban wad ïa ka tyllong haba ïadei bad kine ki jingbyrngem buh ‘bomb’, da kaba buh jingmut ïa ka jingktah kaba rem dor bad kaba la pynkulmar shi kat dei ïa ka karkhana liengsuiñ jong ka India, kaba mynta ka ïakynduh sa kawei pat ka syrtap jingtynjuh ha ka liang ka jingshngaiñ.
