Shillong, Risaw 25
Ka synjuk ki nongñiah taksi kamai ba la tip kum ka East Khasi Hills Local Taxi Welfare Association (EKHLTWA) ha ka Sngi Thohdieng jong ka 25 tarik Risaw 2024, ki la hiar ban leit khynra ïa ki jaka ai wai ar shaka kiba don ha Keating Road, Shillong.
Ha ka jingleit khynra kine ki nongñiah taksi kamai ki la lap ba ïa kine ki jaka ai wai la pynïaid khlem ki kot ki sla ba biang ïa kaba la pynïaid da ki barjylla bad kine ki briew kiba pynïaid ki la ïathuh ba kim don satia ïa ka ‘Permit’ ne ki kot ki sla kiba biang ban pynïaid ïa kane ka kam.
Haba kren sha ki lad pathai khubor, u General Secretary ka Association, u Bah A. Kharbani u la ong ba ka kynhun ka dap da ka jingsngewkhia ban ïohi ïa kane ka jingleh jong ki barjylla ban ai wai ïa ki thuk-thuk arshaka khlem kano-kano ka jingbit ne ka laisen na ka tnad Transport ne wat na ka Sorkar bad ka District Council ruh ban pynïaid ïa kane ka kam jong ki.
“Na ka liang ka seng, ngi sngewdei ba ngin peit bad phaikhmat shwa ha kaba ïadei bad ki arshaka kiba ai wai lyngba ki briew kiba nabar kiba shu wan tang ban kamai ei hangne hapoh ka Jylla jong ngi”, ong u Bah Kharbani.
U la ïathuh ba ka seng ka la lap ba ki don haduh 10 tylli tam ki dukan kiba ju ai wai ïa ki thuk-thuk arshaka bad ki kali ha Khyndai Lad.
U la ong ba haba ka kynhun ka dang pyrshang ban khynra ïa kitei ki dukan, la sakhi ba ki trai jong kine ki dukan ki lah phet noh bak na katei ka jaka.
U Bah Kharbani u la pynrem jur ruh halor ka jingdonkti jong ki trai jylla kiba pyrshang ban kam trai ïa ki dukan jong ki barjylla da kaba ong ba ha manla ki khep jingkhynra, ki ju wan mih kynsan ki trai jylla ban pynrieh tngen ïa ki nongwei-nongar kiba shu wan ban kamai tuh hapoh kane ka Jylla.
“Ngi sngewkhia halor kane ka jingleh shlur jong ki nongwei hangne hapoh ka Jylla jong ngi namar ki khun samla jong ngi kiba kamai thuk-thuk ki mih beit haba shit-ba shai bad ki ju ïeng ha manla ki jaka ïeng la ka long ha Khyndailad ne ha Motphran bad kim long kum kine ki nongwei”, ong u Bah Kharbani.
Na ka liang ka seng ha katei ka jingleit khynra, ka la pynpra noh shisyndon ïa ki ‘sign-board’ jong kine ki dukan bad na ka liang ka kynhun ka la leit ruh ban pynsngew ïa kane sha ka tnad Transport ban kyrpad ba ka tnad ka dei ban leh eiei halor kane.
Shuh-shuh na ka liang ka seng ka la kyntu ruh ïa ka Sorkar ba kan shimkhia halor kane ka bynta namar lada kam leh eiei halor kane ka jingmih ki arshaka kiba kamai beaiñ lyngba ka jingpynïaid jong ki mynder Ri hapoh ka Jylla, na ka liang ka seng kan pynshlur lem ïa ki para nongkamai ban kamai kali noh da ki kali shimet khlem da donkam ban don ïa ka ‘Permit’.
Kham hadien katto-katne por, hadien ba ka seng ka la wan ban ïakynduh ïa u District Transport Oficer (DTO), u Bah Kharbani u la ïathuh ba na ka liang ka ophis jong u DTO, ka la ong ba ka khlem shym la ai jingbit satia ïa kine ki dukan ba kin ai wai ïa ki arshaka, bad ong ba lada ka tnad ka lap biang ïa kum kine ki jingleh, na ka liang ka tnad kan sa pynshitom ïa ki briew kiba donkti ban leh ïa kine ki kam kiba long be-aiñ.
U Bah Kharbani u la ïathuh ba ha ka jingkylli pyrthew ïa ki trai jong kine ki dukan ai wai arshaka, ki la ïathuh ba ki la ïoh jingbit ban pynïaid ïa kane ka kam na ka tnad ki kam jngohkai pyrthei ban seng ïa ki dukan jong ki bad kane ka la pynlyngngoh ngaiñ ïa ka seng ba kumno ka tnad ki kam jngohkai pyrthei ka Jylla kan shim ïa ka kam ba dei khmih da ka tnad Transport.
“Lada ka tnad Transport kam don hok ne kam don bor ban peit ha kaba ïadei bad kine ki arshaka hynrei lada ka don hok pynban da ka tnad ki kam jngohkai pyrthei, nga sngewdei ba ka Sorkar ka dei ban pynduhnoh ïa ka tnad Transport”, ong u Bah Kharbani.
Halor kane ka bynta, na ka liang ka seng ka la rai ba kan sa leit ban ïakynduh ïa u Myntri ka tnad jngohkai, u Bah Paul Lyngdoh namar kum ka kynhun kam sngewïahap ba ka tnad ki kam jngohkai kan tuklar ïa ki kam kali.
