Shillong, Risaw 25
Ka lympung ïalehkai 4th Meghalaya State League (MSL 4) 2024 ban pynïaid da ka Meghalaya Football Association (MFA) kan sdang mynta ka sngi Saitjaiñ. Ki ar tylli ki kynhun kiba la rah teng ïa ka nam lahduh kin pynkhreh ban ïakhun pyrshah ha Wahïajer Multi Sports Complex kaba ha Wahïajer, West Jaiñtia Hills.
Kine ki kynthup ïa ka 7 Wasa United bad ka lahduh jong ka MSL 2019 ka Shillong Lajong. Ïa kane ka lympung yn wan ban plie ha ka por 1 baje nohphai sngi da u Mymbud Myntri Rangbah ka Jylla u Bah Shri Sniawbhalang Dhar.
Ïa kane ka lympung la kyrshan lang da ka tnat ïalehkai jong ka Sorkar Jylla ha kaba yn ïashim bynta da ki klob kiba paw na kylleng ki district ka Jylla ha kaba yn phiah ïa ki ha ki saw tylli ki zone.
Ha ka MSL 2023, ka Rangdajied United FC ka la long ka lahduh hadien ba ka la lah ban pynliem ïa ka Khliehmawlieh Youth Club ha ka jingïakhun final.
Ha kane ka samoi ka don ka jingkylla ha ka rukom ïalehkai, ha kaba ka jingdon jong ki group ka la kiew sha ka hynriew tylli, ha kaba don saw tylli ki kynhun ha kawei pa kawei ka group. La wanrah ka jingpynkylla na kaba la long ha u snem ba la lah da kaba pynrung ïa ki jingïakhun quarter final.
Te kumta ki kynhun kiba kynsai na kawei pa kawei ka group lem bad ar tylli kiba kham kynsai (kiba wan ha ka kyrdan ba-ar) kin ïoh rung sha ka quarter final.
Ka Wahïajer kan pynlong ïa ki jingïalehkai jong ka Group-E bad kane ka dei ka sien kaba nyngkong ba ïa kane ka stadium kaba thymmai kaba la bei pisa da ka Sorkar Jylla yn pyndonkam na ka bynta ki jinglehkai jong ka MSL.
Kiwei pat ki jaka ki ban pynlong na ka bynta ki jingïalehkai ki long ha Tyrsad, kaba long ka jaka kaba bun bha ki paidbah riwe ieit phutbol, katba ka Tura, Shillong, Mawkyrwat basd ka Khliehriat ki long kiwei pat ki jaka ban pynlong ïa kiwei pat ki jingïakhun.
