Guwahati, Risaw:
Ka seng Congress ka la sei ïa ka kyrteng jong u nongïalam barim jong ka seng BJP u Jayanta Bora kum u kyrtong ban ïakhun ha ka ilekshon shiteng samoi ban wan ha Behali bad kane ka la wanrah ïa ki kynrum-kynram hapoh ka kynhun synrop ka liang pyrshah ha Assam.
Ka jingshah jied jong u Bora ka long hapdeng ka jingbym ïahap jingmut hapoh ka kynhun ha kaba ïadei bad ka jingsam ïa ki konstitwensi hapdeng ki seng ka liang pyrshah.
U Jayanta Bora, uba dei u dkhot barim jong ka BJP, un ïakhun na Behali konstitwensi na ka bynta ka seng Congress.
Katei ka rai, ka la wanrah ïa ka jingïakynad hapoh ka kynhun synrop jong ka liang pyrshah, ka Asom Sonmilito Morcha. Ka ilekshon shiteng samoi, na ka bynta ki san tylli ki konstitwensi, ba kynthup ïa ka Behali, kan long ha ka 13tarik, Naiwieng.
Ha ka sienjam kaba la pynmih ïa ka jingïakynad hapoh ka kynhun synrop jong ka liang pyrshah ha Assam, ka Congress ka la jied ïa u nongïalam barim ka seng BJP u Jayanta Bora kum u kyrtong jong ka na ka bynta ban ïakhun ha ka ilekshon shiteng samoi ha Behali, wat la um pat shym la pynïasoh pura bad ka seng.
U Bora, uba dang shu iehnohkam na ka seng BJP, hadien ba um shym la ïoh tiket, u la pynïasoh pura ïalade sha ka seng Congress, ha ka sngi Palei, la ong ka tyllong khubor.
Kane ka jingpynbna kaba kham shwa ka long lyngba ka kyrwoh na u General Secretary ka AICC u KC Venugopal ha ka sngi Balang, kaba la jied ïa u Bora kum u kyrtong ba pura jong ka Congress na ka bynta ka Behali konstitwensi.
Kane ka rai ka la long ha ka por ba don ka jingïakynad kaba jur bha hapoh ka kynhun synrop jong ka liang pyrshah, ka Asom Sonmilito Morcha (ASOM), kaba kynthup ïa ki 16 tylli ki seng, halor mano ba dei ban ïakhun ïa ka Behali konstitwensi.
Katkum ka jingïateh hapoh ka kynhun synrop jong ka ASOM, ki la don saw tylli na ki san tylli ki konstitewnsi ïa kiba la buh na ka bynta ka jingïakhun ïa ka ilekshon shiteng samoi ki dei ban ïakhun da ka Congress, ha kaba ïa ka Behali konstitwensi la mang na ka bynta u kyrtong jong ka CPI(ML) Liberation.
Hynrei kane ka rai ka la shah pyrshah jur na ka kynhun jong ki nongïalam ka Congress ha Biswanath distrik, kiba la jied ïa uwei na ki kyrtong jong ki hi na ka bynta katei ka konstitwensi.
Ki la tyrwa ïa u Dilip Kumar Baruah lane u Premlal Ganju kum ki kyrtong kiba lah ban ïakhun, ha kaba la kyntait ïa ka jingai jingmut ban pynïeng ïa u kyrtong ka CPI(ML) Liberation, kumba la ïathuh da ki lad pathai khubor.
