Shillong, Risaw 27
Ka Shillong Lajong FC ka la pynjem khnap haduh 9-0 kol ïa ka 7 Wasa United ha kaba sdang ïa ka lympung ïalehkai 4th Meghalaya State League 2024 ha ka sngi Saitjaiñ ha Wahïajer Multi Sports Complex Stadium.
U Deibormame Tongper (36′, 45’+2, 56′) u la ïoh ïa ka hat-trick, katba ïa kiwei pat la thep da u Yohaan Benjamin (16′), Ïohborlang L Lyngkhoi (18’P), Mebannangkiew Thabah (48′, 50′), Babysunday Marngar (90’+2) bad u Emanbha Marbaniang (90’+4) na ka bynta ban pynlong ïa ka Lajong ban ïoh lai point na ka Group-E.
Kine baroh ar tylli kynhun ki dei kiba la bat teng ïa ka nam lahduh ha ka MSL. Ka 7 Wasa ka la long ka lahduh ha kaba sdang ïa ka MSL ha u Kyllalyngkot 2018 bad ka Lajong ka la long ka lahduh ha u Nohprah 2019, hynrei kine ki kynhun kim pat ju ïakynduh teng ha ki lympung ïalehkai ba la dep.
Wat lada ïa ka MSL 2024 yn pynlong ha kylleng ki jaka kiba don ha ki district jong ka Jylla, pynban ka Wahïajer ka la ïoh ban sdang ïa kane ka lympung ha ryngkat ka jingkyrshan lang da ka Dorbar Shnong.
Nalor ka Lajong bad ka 7 Wasa, kiwei pat ki kynhun kiba la don ha kane ka group ki long ka Seinbhalang Shkentalang FC bad ka Mawtari Myrdon SC.
Ïa kane ka lympung ba la pynïaid da ka Meghalaya Football Association ha ryngkat ka jingkyrshan pura da ka tnat ïalehkai jong ka Sorkar Jylla, la wan ban plie da u Symbud Myntri Rangbah ka Jylla u Bah Sniawbhalang Dhar ryngkat ka jingsakhi da ki hajar ngut ki paid ‘riew ieit phutbol.
“Ka Meghalaya mynta ka don shibun ki jaka ïalehkai phlang plastik, ki synthetic athletic track bad kiwei kiwei ki jaka ïalehkai,” ong u Bah Sniawbhalang. “Ka Jaiñtia Hills ka dei ka karkhana phutbol naduh mynshuwa bad kane ka dei ban ïai bteng. Ka phutbol kam dei tang ka jinglehkai na ka bynta ban pynneh pynsah ïa ka met hynrei ka dei ka lad ban ïoh kam bad ka kam kaba heh mynta.”
Ha kawei pat ka liang u President ka MFA Bah Hamletson Dohling u la ai khublei ïa ka Sorkar Jylla kaba la ïai bteng ban ai ka jingkyrshan, namar khlem ma ka yn ym lah ban pynlong ïa kane ka lympung.
“Ka MFA ka trei shitom ban kyntiew ïa ka phutbol ha baroh kawei ka jylla na ka bynta ka jingmyntoi jong ki samla,” u la ong haba kdew ïa ka Meghalaya Youth League kaba thymmai bad ka jingpynrung shuh shuh ïa ki synjuk ïalehkai ha ki district.
“Ngi kwah ba ka Meghalaya kan pynmih shuh shuh ïa ki nongïalehkai ba pawnam bad kan long ka ri kaba donbor ha ka phutbol,” u la bynrap.
Haba phai sha ka jingïalehkai, ka Lajong ka la pynkyndit ïa ki nongïalehkai ka liang pyrshah namar kam shym la poi pyrkhat ba kan shah thep haduh 9 kol. Kane ka wan lyngba ka jingïalehkai bha ki rangïalehkai naduh kaba sdang haduh kaba kut.
