Khliehriat, Risaw 27
Ka jingïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA) ka la kut noh da ka jingïakhaid ha baroh ar tylli jingïakhun.
Ïa kane ka lympung ïalehkai la pynlong ha madan Artificial Turf Diengshynrum, Khliehriat ha ka Sngi Saitjaiñ.
Ha ka jingïalehkai kaba nyngkong hapdeng ka Bataw YWSC bad Lumshken SC ka la kut da kaba ïakhaid mar 2-2 kol.
Ïa ki kol jong ka Bataw YWSC la thep da u Jesper Lamare ha ka minit ba 38 bad Marbud Suchiang ha ka minit ba 70. Katba na ka bynta ki kol jong ka Lumshken SC la thep da u Baleski Lamo ha ka minit ba 59 bad Kiarbes Lyngdoh ha ka minit ba 82.
Ha ka jingïalehkai kaba bud ruh ka jingïakhun ka la kut da ka jingïakhaid mar 1-1kol hapdeng ka Tpepswer SSWO bad Rymbai Wahshnong SC.
Na ka bynta ka Tpepswer la thep kol da u Chemi Suchiang ha ka minit kaba 8 bad ïa ka Rymbai Wahshnong la thep kol da u Omebiang Lyngdoh ha ka minit ba 12.
Ha ka Sngi Baar ka jingïalehkai kan long hapdeng ka Moolamanoh SC bad Rymbai Synrangshahkhain SC ha ka por 12.00 baje mynsngi. Ka Wahiajer Narpuh YSSC bad Jalyiah UTD SC ha ka por 2.30 baje nohphai sngi.
