
Shillong, Risaw 27
Ka Committee kaba la thung da ka Meghalaya Cricket Association (MCA) ka ban khmih bniah ïa ka kam kaba ïadei bad ka jingshim bynta ïa ki rangïalehkai na shabar jong ka Jylla ban mihkhmat ha kane ka samoi ïalehkai kaba mynta jong ka BCCI ka la wan shakhmat ba kan shim ïa ki katto katne ki rai ha kaba ka la dep ba kan aiti ruh ïa ka kaiphod sha u Secretary ka MCA.
Kat kum ka kaiphod la ïoh jingtip ba kane ka committee ka la ai jingmut ba kan shah ne ailad ïa ki phra ngut ki rangïalehkai ban lah ban mihkhmat ïa ka Meghalaya.
Dang mynshem bnai ka la don ka jingujor pyrshah ha kaba ïadei bad ka jingïohlad jong katto-katne ki rangïalehkai ha ka kyrdan jong ka Senior Men’s U-23, kaba pynlong ïa ka MCA ban shim ïa ka sien jam da kaba thung ïa ka komiti jong ki lai ngut ki dkhot kaba kynthup ïa vice-president u Bah Rayonald Kharkamni bad ar ngut ki dkhot ka Apex Council u Bah Arwotki Sumer bad u Sengnab Momin ba kin khmih bniah halor jong kane ka bynta.
Hadien ba la bishar bniah lyngba ki kot ki sla kiba donkam naduh ka Birth Certificate, Aadhaar Card, Voter Identification, kane ka komiti ka la sngewdei ba kan shah ïa 8 ngut ki rangïalehkai kiba nabar, kata u Jaskirat Singh Sachdeva, Arpit Bhatewara (Senior Men’s team), Rohit Kumar Yadav, Raghav Kumar Magotra, PM Santosh, Kevin Sanjeev Christopher, Abhishek Kumar bad Sachin Kumar (U-23 Men’s team) ba ki lah ban mihkhmat ïa ka Meghalaya ha kane ka samoi ïalehkai kaba mynta ka samoi.
Katba ar ngut ki rangïalehkai ba kynthup ïa u Sachin Kumar bad Rohit Kumar Yadav, ki la ïoh shwa ban pdiang tang ïa ka provisional clearance da kane ka komiti bad ki donkam ban aiti ïa ki syrnod skul bad syrnod shnong shwa ban shah ne ailad ïa ki ban mihkhmat ïa ka Jylla.
Shuh shuh kane ka komiti ka la shim ruh ïa ka rai ba u Banïalam Mylliemngap u bym shym la lah ban pynrung ha ka thup jong ka kynhun ïalehkai U-23 lehse yn lah ban pdiang ïa ka jingjied biang pat ïa u ka ban shong ha ka jinglah ka jong u ban koit noh na ka jingshitom bad ban da ïoh ïa ka fitness clearance na ka kynhun jong ki physiotherapist.
Sa kawei pat ka jingai jingmut jong kane ka komiti ka long ba nangne shakhmat ka MCA ka dei ba kan kyntu ïa baroh ki synjuk ïalehkai kriket ba don ha kane ka jylla ba kin da pyntikna ïa ki kot ki sla kiba donkam jong ki nongïalehkai ha shawa ba kin aiti pat sha ka MCA, kaba long kat kum ka kyndon ba la pruid da ka BCCI.
Ka jingai jingmut ba khatduh na kane ka komiti ka long ba ka MCA ka donkam ban thung ïa uwei u nongjied ïa ki nongïalehkai (selector) na ka kynhun jong ka Senior Men Selection Committee kaba donkam ba un da don beit da la ka met ha ki por ba ka kynhun ïalehkai ka jylla ka ïakhun ha la ïing ne shabar na la ïing. Kane ka long khnang ba un ïoh ïa ka lad ban khmih bniah ïa ka jinglong-jingman bad ka rukom ïalehkai ki nongïalehkai ha ki jingïakhun kiba dang sah jong ka Ranji Trophy 2024-25.
Hadien ba la ïoh ïa ka jingai jingmut na katei ka komiti (Senior Men Selection Committee), ka MCA ka la lah pat mynta ba kan pynrung ïa ka kyrteng jong u Arpit Bhatewara ha ka thup ïalehkai kaba 15 ngut jong ka Jylla ka ban dangbteng ban ïakhun ïa ki jingïalehkai kiba dang sah ha ka Ranji Trophy 2024-25. Katba ka kyrteng u Jaskirat Singh Sachdeva la dep lypa ban pynrung naduh kaba sdang bad uba long tang ma u ba lah ban kamai bun run ha ka jingïakhun kaba dang-shu dep bad ka Tripura.
Ka jingïakhun ban wan jong ka Meghalaya ha ka Ranji Trophy kan long pyrshah ïa ka Maharashtra ha Aurangabad naduh ka 26 tarik mynta u bnai. Hadien kane kan wanphai biang sha la ïing ban ïakhun pyrshah ïa ka Jammu & Kashmir ka ban sdang naduh ka 6 tarik Naiwieng.
Ki kyrteng ba pura jong ki rangïalehkai ka Jylla ha ka Ranji Trophy mynta ka samoi ki kynthup ïa u Aryan Borah, Akash Kumar Choudhary, Bamanbha Shangpl-iang, Bijon Dey, Chengkham Sangma, Dippu Sangma (V-C), Jaskirat Singh Sachdeva, Kishan Lyngdoh (C), Ram Gurung, Roshan Warbah, Lerry G Sangma, Arpit Bhatewara (WK), Ajay Duhan (BCCI approved guest player), Sumit Kumar (BCCI approved guest player), Anirudh B (BCCI approved guest player). Kiba la shu pynap lypa ki long u Aadarsh Joshi, Anish Charak, Wanlambok Nong-khlaw, Shembhalang Pyngrope & Arien B Sangma.