Shillong, Risaw:
Ïa ka Annual General Meeting ka Seng Kur Lamin Shillong la dep ban pynlong ha ka 12 tarik, Risaw, 2024 ha ka Auditorium jong ka Umshyrpi College, Laban, Shillong. U President ka Seng Kur ha ka jingkren maitphang u la pynkynmaw ba ïa ka Seng Kur Lamin Shillong la seng ha ka 27 tarik, Lber, 2002 da ka jingbtin lynti i Mei-ïeid Celestina Lamin, I.A.S. ba la khlad noh, u Prof. Henry Lamin, uba la ju long u Pro-Vice Chancellor ka Skulbah NEHU, Shillong ba kiwei ki ‘riew rangbah.
U la pynkynmaw ruh ba ki Lamin, Laloo, Diengdoh, Marngar bad Parïong ki dei ki khun ka Shibidi, ka Ïawbei Tynrai kine ki 5 kur bad ka kur Lamin ka don kumba 47 kpoh kum ka Lamin Pohlynjar, Lamin Pohsnem, Lamin Pohduna, Lamin Pochen, Lamin Mohmren, Lamin Amdep, Lamin Kaiang, Lamin Kashnga, Lamin Kasah, Lamin Kadiang, Lamin Kaot, Lamin Kadew bad kiwei kiwei.
Kine ki don ha kylleng ka Bri ki Hynñiewtrep Hynñiaw-wasa. Ha kane ka jingïalang la ïoh ban pynskhem ïa ki nongkitkam bad ïa ki dkhot jong ka Executive Committee na ka bynta lai snem (2024-2027). La ïakren sani bha ïa ka Khasi Social Custom of Lineage Act, 1997, ïa kaba la thaw da ka Khasi Hills Autonomous District Council (1997) bad ïa ki kyndon kiba la kynthup ha kane ka Act.
La pynsngew ruh ha ka jingïalang ïa ka jingpynban jong ka KHADC ba baroh ki Seng Kur kiba don hapoh ka jingsynshar ka District Council ki dei ban ïoh ïa ka jing-ithuh (Register) da ka KHADC. Ka Seng Kur Lamin Shillong ka kynthup ïa baroh ki Kur Lamin kiba shong ba sah hapoh u pud ka jingsynshar ka KHADC.
La ïoh ruh ban ïaphylliew jingmut ïa ka jingsynjor jong ka jingsneng jingkraw kiba bha la ha ka shimet ne ha kaba ïadei lang haïing-hasem bad ha ka imlang ka sahlang, namar ka jingïatyngkhuh, ki jinghikai ïa kiba ngi la ïoh na ki longshwa-manshwa jong ngi (Indigeneous Values) bad ki jinghikai ka juk mynta, kaba ong ba ym don kano kano kaba neh kaba sah, hynrei tang ki jingkylla suda. Hynrei haba ïitbniah, ngi shem ba ki don kiei-kiei kiba neh kiba ngi la ïohpdiang na ki longshwa-manshwa, ïa kiba ngi dei ban ailem sha kiwei ki jaitbynriew, kita ki long, ka tip-briew-tip Blei, ka tip-kur ka tip-kha, ka tip-akor ka tip-burom bad kaba ñiewkor ïa ka jinglong bahok. Ka Seng Kur ka dawa ban shim ïa ka jingkitkhlieh ban pynkhie-im thymmai ban sneng ban kraw da kine ki jinghikai ba ngi la ïohpdiang na ki long-shwa-manshwa.
