Shillong, Risaw 27
Ka Maraikaphon Youth Club ka la ïoh jingjop ha ka semi final (1st leg) jong ka U-14 Football Tournament 2024 ba la pynïaid da ka Maraikaphon Youth Club, hadien ba ka la lah ban pynliem noh ïa ka Seng Samla Mawmluh da 2-0 kol ha ka Sngi Saitjaiñ ha madan Maraikapjon kaba ha Sohra.
Kane ka nam jop ka la wan urlong lyngba ka jinglah ban ïalehkai bha naduh kaba sdang ha kaba u Jayson Dohling u la ïoh ban pynkhih jar nyngkong eh ha ka minit ba 9 bad tang 4 saw minit kane ka kynhun ka la pynbud biang ïa ka kol ba ar lyngba u Arvinderson Wahlang.
Wat lada ka liang pyrshah ka la pyrshang kat lah kat ïai ban ïakhun tyngeh na ka bynta ban pynphai kol, hynrei haduh kaba kut jong ka jingïalehkai kam shym la lah ban pynurlong bad ka la mad ïa ka jingshah rem.
Lyngba kane ka jingjop ka Maraikaphon Youth Club ka la don jingkyrmen ban ïoh rung sha ka final, hynrei ka donkam ban ïalehkai bha ha ka wat ba ar (2nd leg) pyrshah ïa ka SSM ka ban long ha ka 30 tarik mynta u bnai.
Kawei pat ka jingïakhun semi final wat ba ar (2nd leg) kan long ha ka 29 tarik hapdeng ka Mawreng Junior Academy bad ka Mawkma Youth Club.
