Shillong, Risaw 27
Hadien ba la dep ban thep kyrteng ban ïakhun ha ka ilekshon MLA shiteng samoi ha Gambegre, ka jingbishar bniah ïa ki kot ki sla jong ki kyrtong da u Returning Officer kan long ha ka Lah Sngi U Blei ha Tura.
Ha kane ka sngi bishar bniah ïa ki kot thep kyrteng, baroh ki kyrtong kin donlang ha kamra u Returning Officer ban pynshisha ïa baroh ki jingthoh kiba la pyni ha ki kot thep kyrteng.
Ka sngi bakhatduh ban weng kyrteng noh lada don kino-kino ki kyrtong kiba kwah ban weng na ka jingïakhun ka dei ha ka 30 tarik.
Ka sngi ban thep kyrteng ka la kut ha ka 25 tarik na ka bynta ka ilekshon shiteng samoi ha Gambegre konstitwensi bad ki don 6 ngut ki kyrtong kiba la thep kyrteng.
Kine hynriew ngut kiba la thep kyrteng haduh ka sngi bakut ka jingthep kyrteng ki long ka kurim u Myntri Rangbah ka Dr. Mehtab Chandee A Sangma kum ka kyrtong ka National People’s Party (NPP), u Jingjang M Marak kyrtong ka Indian National Congress, ka Sadhiarani Sangma kaba dei ka kyrtong jong ka All India Trinamool Congress (AITC), nalor u Bernard N Marak kum u kyrtong ka BJP.
Ar ngut kiwei pat kiba la thep kyrteng kum ki kyrtong shimet ki long u Sengkrabirth M Marak bad u Jerry A Sangma kiba la thep kyrteng ban ïakhun.
Ka jingthep vote ha Gambegre kan long ha ka 13 tarik Naiwieng bad ka jingñiew vote ha ka 23 tarik Naiwieng.
