Uba thoh ïa kane ka khubor u dei u rangbah uba trei shabar jylla la bun snem, uba dang shongthait shen.
Ki kynhun bapher bapher bad kumjuh ruh daki nongmihkhmat shimet kiba bun ki la ïa shim bynta ha ka Public Hearing bala pynlong da ka Expert Committee ha ka 3rd 4th & 5th une u bnai October 2024. Kane ka Public Hearing la pynlong, khnang ba ka Expert Committee ka ïoh jingmut da kaei ka phang kaba bha tam ban mang ïa ka jingbhah ïa ka thungkam thungjam hapdeng u Khasi-Pnar bad u Garo. Kiba shim bynta ki dei ki briew kiba la tip kum ki nongïalam-nongmih khmat kiba la paw bha ha ri Khasi-Pnar.
A. Kat kum ki jingtip ba la ïoh lum na ki khubor bad social media la don bun ki jingai jingmut ïa ka Expert Committee, kum kine harum,
1.Don kiba ai jingmut ban shim da ka Nongrim ka jingbun briew hapdeng u Khasi – Pnar bad u Garo,
2.Don kiba ong ban pynshong Nongrim ha ka ïoh ka kot ki nongshong shnong,
3.don kiba ong ban ai jingbhah la ka jong ïa u nongkyndong bad la ka jong ïa u nongsor,
4.Don kiba ai jingmut shaphang ban pynbeit ïa ka jingbhah thung kam hapoh ka District Level ruh,
5.Don kiba ai jingmut ban pynshong nongrim ïa ka jingbhah kat kum ki statistics jong ka Sustainable Development Goals (SDG) ka ba la pynkhreh da Niti Ayog,
6.Don kiba ai jingmut ban mang ïa ka jingbhah kam ka ba dei ban long legally bad constitutionally,
7.Don kiba maham ba ka jingbhah (reservation) kam dei ban palat ïa ka 50% ha ka Jylla,
8.Don na pdeng ki nongïalam ba paw bad kiba kham sngewsbun mynsiem ki ai jingmut, ba dei ban mang ruh iaki EWS (Economically Weaker Section),
9.Don ki nongïalam kiba ai jingmut ban pynkiew ka jingbhah kam ïa ki OTHER TRIBE sha ka 10% ne haduh 15%.
10.Don ruh napdeng kiba wan, ki ai jingmut ba dei ban mang ka jingbhah 5% ïa ki ba don jingduna dkhot met,
11.Don kiba ong ba ki kam ki jam la kham ïoh bun u Khasi-Pnar ban ïa u Garo, te ka Expert Committee ka dei ban peit ïa kane ka REALITY.
Kitei ki jingai jingmut ki dei kiba kham kongsan.
Haba ïohi ïa kitei ki jingai jingmut, kumno ka Expert Committee kan rai, bad ïa kano ka jingai jingmut kan shim bad ïa kano kan kyntait. Ngin sa ïohi hadien.
Ngin peit shwa pat, kumno ka sorkar kmie (Central Government) bad kiwei ki sorkar jylla ki pynshong nong-rim bad buh ki kyndon ban mang ïa ka jingbhah kam (reservation) ïa ki Schedule Tribe bad Schedule Caste ha ka ri India kyllum baroh kawei bad haki jylla bapher bapher.
Hangne, ha jaka ka ktien RESERVATION ngin pyndonkam da ka ktien REPRESENTATION, katno u Khasi-Pnar ne u Garo ki mih khmat ha ki jingïoh kam ïoh jam bad ha ka pule-dangle; namar ha ki jylla ba khyndiat paid ki SC/ST kan kham ïadei ban pyndonkam da ka ktien Reservation, kum ha jylla Meghalaya ba bun paid da ki ST kan kham shongnia ban pyndonkam da ka ktien Representation.
Na kitei ki jingai jingmut (suggestion) ngin ïa peit bniah kano na ki kaba kham don ka nongrim ba ka Expert Committee ka dei ban pdiang.
Shwa ba ngin ïaid shaphrang, ngi dei ban kynmaw bad ba yn ym sngewthuh bakla ïa kine ki mat harum, ba:
i) ïa ka Expert Committee la thung ban peit ïa ka jingmang bhah kam hapdeng u Khasi-Pnar bad u Garo, kaba ïadei bad ka State Level Employment ha kaba la bhah 40% ia U Khasi-Pnar bad 40% ïa U Garo. Ym dei ban ïaid lait ïa kata bad ym dei ban wan rah ka jingbhah hapdeng ki para Khasi-Pnar (namar u Khasi bad u Pnar u dei na ka juh ka tynrai ne ethnic origin) ne hapdeng para Garo. Ngi dei ban kynmaw ba dang hapoh ka jylla Assam, ka 6th Schedule ka la bynta ïa kawei pa kawei ka tynrai riewlum (ethnic origin) ha ki District bapher, kum ka Naga Hills District, ka United Khasi-Jaiñtia Hills District, Lushai Hills District, ka Mikir Hills District bad Garo Hills District. Ynda la thaw jylla ïa ka Meghalaya la pynsnoh lang ïa ka United Khasi-Jaiñtia Hills District bad ka Garo Hills District. Wat la ïa pynsnoh ïa kine ki ar tylli ki District, hynrei u Khasi-Pnar bad u Garo ki dei ban bad la ka jong ka tynrai lane ethnic identity. Dei na kata ka daw, tang mar ïa ïoh ïa ka jylla ba pura la thaw ïa kane ka State Reservation Policy ban bhah ïa ki kam/post hapdeng kine ki ar tylli ki ethnic group. Lyngba ka Reservation Policy ngi lah ban tip katno u Khasi – Pnar bad u Garo ki dei ban ïoh kam lane ban mih khmat/REPRESENT haka ioh kam ïoh jam. Ngi dei ruh ban kynmaw ba ka Carry FORWARD ïa ki post ki bym la lah ban pyndap ha ka jingthung kam bala dep la ai kyrpang ïa ki Garo.
ii)Ka Expert Committee kam dei ban mushlia ïa ka District Level Employment kaba la pynshai ha ka Clause 2.2. Namar kumba la iohi ba bun ki ïa mynjur ïa kane.
B.To ngin ïa pynshong nia ïa ki mat ba la buh da kito ki nongmih khmat;
1.Ka Nongrim ban pynshong kat kum ka jingbun paid hapdeng u Khasi-Pnar bad u Garo – Haba ka sorkar kmie ka ri India kala rai ban ai bhah ïa ki kam/post ïa ki SC bad ST, ka la bud da ka kyndon kaba ka la pynshong Nongrim ha ka jingbun paid jong ki SC bad ST.
Ka Mandal Commision report 1980 ha ka sla No 6, ka kynthoh ba la sdang ban ai lad ha ka jingthung kam ïa ki jaid “bapoh” naduh ka snem 1934; namar ym pat don jingkheiñ katno ban mang ïa ka jingbhah kam, ha u snem 1943 ki mang 8.5% ïa ki SC ban ai kam. Ha u snem 1946 ynda la ïoh ïa ka jngkheiñ briew (Census) ka sorkar, ka la mang 12.5 % ia ki SC kat kum ka jingbun briew jong ki. Ha kata ka por ym shym la lah ban mang ka jingbhah kam ïa ki ST ba ym pat don napdeng jong ki, kiba biang ha ka pule dangle ban ai kam.
Nalor kane, sa ka sorkar India kat kum ka OM Dated 23.01.2014, (GOI, Ministry of Personnel Public Grievance & Pensions; Deptt. of Personnel and Training, paragraph 1.7,) ka kynthoh ba kat kum ka Census 1961 la shem ba ka jingbun briew ki SC bad ki ST (haba ïa nujor bad ka jingbun briew haka ri), kala kiewsha ka 14.64 % ha ki SC bad 6.80 % haki ST. Na kata ka daw ïa ka reservation jong ki SC naka 12.5 % la pynkiew sha ka 15 % bad na ka bynta ki ST la pynkiew naka 5 % sha ka 7.5 %, kaba la pynshong Nongrim kat kum ka jingbun briew jong ki.
Sa ka Supreme Court haka mukot-duma, Case No. WP(C) No. 000079-000079/1979, R. K. Sabharwal & Ors Vs. State of Punjab & Ors, dated 10.02.1995, ka kynthoh ba ka % jong ka reservation ka dei ka jingmih khmat/representation ha ka ïoh kam ioh jam ki ba sahdien (backward) kaba dei ban shim na ka jingbun briew kita kiba sahdien da kaba ïa nujor bad ka jingbun briew ka jylla baroh kawei (based on the proportion worked out in relation to their populations”).
Sa ha Kiwei kiwei ki jylla ha ka ri India ki mang ïa ka % reservation ïa ki SC & ST kat kum ka jingbun paid jong ki ha la ka jylla; kum ka nuksa, ha Bihar ki briew SC ki don 16%, ka jingbhah kam/reservation ïa ki, la mang 16%, ki briew ST ki don 1.3%, ka reservation ïa ki la mang 1%. Ha Tamil Nadu, ki SC ki don briew 20%, ka reservation ïa ki ka dei 18%, ki ST ki don briew 1%, ka reservation ïa ki la mang 1%. Ha Jharkhand ki SC ki don briew 12.08% ka reservation ïa ki ka dei 12%, bad ki ST ha Jharkhand ki don 26.21%, ka reservation ïa ki la mang 26%. Ha Mahashtra ki SC ki don briew 12% bad ka reservation ïa ki ka dei 13%, ki ST ki don briew 8% bad ka reservation ïa ki la mang 7%.(Census 2011)
Kat kum ki jingshisha ba la pyni haneng ngi ïohi, ba ka jingbhah thung kam, lane reservation ne representation jong ki SC & ST la pynshong Nongrim kat kum ka jingbun briew jong ki ha la ki jong ki jong ki jylla bad ha kaba ïadei bad ki kam ka Central, ka sorkar kmie ka mang ïa ka jingbhah kat kum ka jingbun briew ki SC/ST ha ka ri baroh kawei.
2. Ban pynshong Nongrim ha ka ïoh ka kot – Ka Article 46, ka Constitution ka la buh ka aiñ ba kyrpang na ka bynta ki Schedule Tribe (kumjuh ruh ïa ki Schedule Caste) ba ka sorkar jylla ka dei ban plie bad thaw ka lad kumno ban pynkiew ïa ka roi ka par, ka ïoh ka kot bad ïa ka jingnang jingstad ki ST/SC. Namar kata ka jingioh jingkot kam dei ban shim kum ka Nongrim ha ka jingbhah kam ne reservation/representation, namar, kumba la ong ba dei ka kamram ka sorkar jylla ban leh ïa kata.
Nalor kata, ka Supreme Court ha ka Case jong ka Indira Sawhney Vs Union Govt and Ors, dated 13.12.1999, ka la kynthoh ba ïa ka ïoh ka kot (income) ym lah ban shim kum ka Nongrim (criteria) ban bynta ïa ka jingbhah kam ïa ki SC/ST.
3. Ban mang quota la ka jong ïa ki nongkyndong bad la ka jong ïa ki nongsor – Namar la bun snem ngi ïohi ba bun kiba kham mih sha khmat, la ha ka kam ka jam ne ha ka pule-dangle dei kiba na wan na nongkyndong. Ban mang ka jingbhah ha kane ka Nongrim ka long kaba eh, khamtam ba kane ka Review ai ka jing-bhah kam, da ka Expert Committee, ka dei hapdeng u Khasi – Pnar bad u Garo, ym dei hapdeng para Khasi-Pnar ne hapdeng para Garo.
4. Ka jingbhah kam/reservation hapoh ki District Level- Katkum ka jingbthah ka Reservation Policy ha ka clause 2.2, ka reservation hapoh ka District Level ka long kaba biang, (wat la ka jingpyntrei kam ne implementation ka la long kaba bakla haduh ka 2023, la batai ïa kane ha kathie ka paragraph Charum). Ka Expert Committee kam dei ban ktah ïa kane.
5. Ban pynshong nongrim kat kum ki statistic jong ka Sustainable Development Goals (SDG) ba la pynkhreh da Niti Ayog-Ka SDG la pynmih da ka UNO ha u snem 2015, ka la kyntu ïa ki ri ka pyrthei baroh ban pyntrei kam ïa kaneprogramme. Ka SDG ka dei ka programme ba la pynkhreh ban pyntrei kam da ki ri ka pyrthei da ka jingthmu ban pynkiew ïa ka roi ka par ha ka im-lang sah-lang jong ki jaid bynriew ha ka pyrthei bad ban ïada ïa ka mariang (committed to achieving sustainable development in its three dimensions – econo-mic, social and environmental). Da ka jingpyntrei kam ïa ka SDG la khmih lynti ban pynkut ïa ka jingkyrduh jingkordit ha baroh kylleng ka pyrthei ha u snem 2030.
Ka ri India ka la sdang ban pyntrei kam ïa ka SDG naduh u snem 2018 bad ka la buh jingthmu ba mar shiteng na kiba don ha ka jingduk jingkyrduh mynta, yn pynlong ïa ki kiba dap ba biang noh ha u snem 2030.
Na katei ka jingthmu ban pyntrei kam ïa ka SDG, ngi sngewthuh ba nyngkong eh, ka long ba lyngba ka jingpyntreikam ïa ka SDG, ka sorkar kmie ka lah ban ithuh ïa ka jingpyntrei kam ïa ka lad jingpynroi jingpar ha ki jylla bapher bapher, bad nangta ban mang pisa ïa ki, ban bynta ïa ki programme, ki scheme bad kiwei kiwei ki lad ban pynroi bad pynkiew ïa ka roi ka par jong ki jylla bapher bapher. Kumjuh ruh ban pynshlur ïa ki nongbei tyngka shimet khamtam sha ki jylla ba dang sah dien kum ka ha ki jylla ha NE.
Kaba ar ka long ba ha kiwei kiwei ki jylla ka ri India ki pyndonkam ïa ka SDG tang ha ka state level namar ba ym pat don ki jingkheiñ jingdiah kiba biang ha ki district level, kumjuh ruh kan long hi kumta ha Meghalaya. Kam mut ba ha ki District ka jylla Meghalaya ki jingkheiñ jingdiah ka kham bha bad tikna ban ha ki District jong kiwei kiwei ki jylla ka ri India.
(Yn dang bteng)
