Sha Delhi yn leit pan jingkyrshan pisa u Bah Sanbor ban tei jaka sumar ïa kiba dih drok

U MLA ka BJP na South Shillong, u Bah Sanbor Shullai u la pynpaw ka jingsngewkhia halor ka jingbym biang ki jaka sumar (Rehabilitation center) ïa ki briew kiba la shah the kynjri ha u...

Shillong, Risaw 27

U MLA ka BJP na South Shillong, u Bah Sanbor Shullai u la pynpaw ka jingsngewkhia halor ka jingbym biang ki jaka sumar (Rehabilitation center) ïa ki briew kiba la shah the kynjri ha u drok, ha kaba u la ong ba ha kiwei ki Jylla ka thaiñ Shatei Lam Mihngi ka Sorkar India ka bei pisa da ki hajar klur ban seng ïa ki jaka sumar, bad pynpaw ruh ba tang ha Assam ki don kumba 1500 tylli ki jaka sumar ïa kiba dih drok bad kiba ka Sorkar Pdeng ka bei pisa da ki klur.

“Nga kum u MLA ka BJP uba dei shibynta ha ka Sorkar, ngi la thaw kawei ka committee ban ïakhun ïa u drok, hadien ba ngi la dep ban pynsngewthuh paidbah ïa ki jingma jong u drok, ngin leit sha Delhi ryngkat ka jingtyrwa ban buh ïa ki jaka sumar ïa kiba dih drok”, la ong u Bah Sanbor.        

U la ïathuh ba u la dep ban ïakren ruh bad u Myntri Rangbah ka Jylla, u Conrad K Sangma bad kumjuh bad u Myntri ka tnat Social Welfare Department ban ïatreilang, bad na ka bynta kane ka jingdonkam shen yn sa leit ban peit ïa ka jaka ha Mawdiangdiang.

“Ngin bud ïa ki kyndon ba donkam na ka bynta ban ïoh ïa ki jaka sumar, ngin pynkhreh ruh ïa ka Detail Project Report (DPR) bad ngin leit sha Delhi ban pan jingkyrshan pisa na ka Sorkar Pdeng”, la ong u MLA ka BJP.

Ha kawei ka liang u la ong, kumba ka long mynta haba don kiba la ngop ha u drok ka committee ka leit wad bad ïasyllok bad hadien ka phah pat ïa ki sha ki jaka sumar.

U la ong shuh shuh shuh ba u kwah ba ki samla, ki longïing longsem kin shim ïa kijuh ki sienjam ban phah ïa ka khubor kaba khlaiñ ban pynsaphriang ïa ka jingma bad jingsniew kaba mih na u drok.

“Ngi donkam ban ïatreilang, namar tang ka Sorkar marwei kan nym lah ban ïakhun ïa ka jingjyllei u drok, ngi donkam ka jingkyrshan na man la uwei pa uwei u nongshong shnong”, la ong u Bah Sanbor.