Shillong, Risaw 28
Ka Rangdajied United FC kaba la rah teng ïa ka nam lahduh kam shym la lah ban thep kol ha ka jingïakhun pyrshah ïa ka Rymbai Skhenshynriah ha ka Group-D jong ka Meghalaya State League 2024 ha ka Lah Sngi U Blei ha Khliehriat bad ha kane ka sngi la lah ban pynlong ha baroh san tylli ki zone kiba ha kylleng ka Jylla.
Ha Mawkyrwat, ka Khliehmaw-lieh Youth Club kaba la wan ha ka kyrdan ba-ar ha ka MSL 2023, ka la mad ïa ka jingshah rem ha ka Mawten SC da 2-1 kol ha ka Group-B, hynrei ka Mawlai SC ka la lah ban pyni ïa ka jingkhlaiñ bor na ka bynta ban pynliem ïa ka Seng Samla Mawmluh haduh 16-0 kol ha ka Group-F kaba la long ha ka nongbah Shillong.
Ïa kitei ki ar kol na ka Mawten la thep da u Oversharp Ïawphniaw ha ka minit kaba 54 & 87 hadien ba ka Khliehmawlieh ka la ïoh ban thep kol nyngkong ha ka minit kaba 52 lyngba u Livingstone Nongrang.
Ha ka jingïakhun jong ka Group-F ha Shillong, u Khrawkupar Jana (18, 26, 28 & 63) bad u Donlad Diengdoh (20, 39, 70 & 90) ki la thep mar saw kol, ar kol la thep da u Fairming Suting (73 & 85), katba ïa ki shi kol la thep da u Batskhemlang Mawlong (22), Robertson Khongriah (56), Over-kindness L Mawnai (58), Banrap-lang Pyngrope (78), Romarius Laban (83) bad u Brolington Warlarpih (86).
Haba ka jingïakhun jong ka Group-A kaba la long ha Tura, ka Chipakkore bad ka Atong Matgrik ki la ïasam mar shi point hadien ba kim shym la lah ban thep kol. katba ha Wahïajer, ka Mawtari Myrdon ka la pynliem noh ïa ka Seinbhalang Shkentalang da 3-1 kol ha ka Group-E. Ïa kine la thep da u James Warlarpih (18) bad u Baris Taro (39 & 67), katba ba u Tip Rasmut (45+1) u la lah ban pynphai kylla shi kol na ka bynta ka Shkentalang.
