U ba thoh ïa kane ka khubor u dei u rangbah u ba trei sha bar jylla la bun snem, u ba dang shongthait shen
(ba bteng)
Ka lai pat ka long ba kat kum ki report ka SDG ba la pynmih ha ka snem 2021 bad 2022, la ïohi ba ka jylla Sikkim ka ba dei ka jylla ki ST ha kane ka thaiñ NE, ka wan long ba NYNGKONG (1) napdeng ki jylla ha NE ha ka jingkiew ka ïoh ka kot, ka roi ka par, bad ka ïeng ba PHRA (8) hapdeng ki jylla baroh ha ri India. Ka jylla Sikkim ka ïeng (rank) sha khmat ka jylla Gujrat, ka Maharashtra, ka Telengana, kham sha khmat ka Punjab, Rajasthan kiba la jutip kum ki jylla ba la roi la par bha. Lada shim ia ki Report ka SDG ban pyndonkam kum ka Nongrim ha ka jingbhah kam ne Reservation kata ka mut dei ban pynduh ST noh ïa ki nong Riewlum ka jylla Sikkim, namar kat kum ki SDG Report ka jylla Sikkim ka la kham dap kham biang ban ïa kitei kiwei pat ki jylla ka ri India kiba la kdew haneng.
Na kitei ki lai tylli ki jingpynshisha, yn ym lah ban pyndonkam ïa ka SDG Report kum ka nongrim ban shim ha ka jingkheiñ ban pyndonkam na ka bynta ban mang ïa ka jingbhah kam ne Reservation. ïaka SDG Report dei ban pyndonkam tang na ka bynta ki liang trei kam ha kaba ïa ka SDG Index la pynkhreh khnang, ym dei ban pyndonkam ha kiwei kiwei pat ki liang. Lah ban pyrkhat ïa kata hadien ba la kut ka snem 2030 ynda la pynshisha ba ka long ka Report bad jingkheiñ jingdiah kaba la biang bha.
6.Ki ong ba ka jingbhah kam/reservation% ka dei ban long ka ba kat kum ka aiñ lane ka ba long legally bad constitutionally-Ka jingpynshisha haneng B., 1. ban shim kat kum ka jingbun briew ban bynta ïa ka jingbhah kam lane reservation lane % representation ka dei ka kyndon ka ba la pdiang da ka aiñ bad ka ba long legally bad constitutionally. Namar ka dei ka kyndon ba la bud da ka sorkar kmie bad da kiwei ki jylla ha ka ri India bad ba ladep mynjur ruh da ka ïing bishar, Supreme Court.
7.Ka jingmaham ba ka jingbhah kam/reservation % ha ka jylla kam dei ban palat ïa ka 50% – Ka aiñ ka ba buh ïa ka jingbhah kam/ reservation % hapoh ka 50 %, ka trei kam tang ha ki jylla ha kaba ki ST bad SC ki don tang khyndiat briew eh; kum ha Maharashtra ki SC ki don 12% bad ki ST ki don 8%, kum ha kito ki jylla ka jingbhah kam/reservation % kam dei ban tam ïa ka 50%. Ha ki jylla rilum, kum ha Nagaland, Meghalaya bad kiwei kiwei ha kaba ki ST ki dei kiba bun paid (majority) ka aiñ 50% kam trei kam.
8.Don ki nongïalam kiba ai jingmut ban mang ruh ïa ki Economically Weaker Section (EWS) – Ka jingmang ïa ka jingbhah kam ïa ki EWS, kat kum ka ïing Bishar ka shong ha ka mon bad jinglah bor ka sorkar ki jylla. Ka Assam ka khlem pyntreikam ïa ka jingbhah kam ïa ki EWS. Namar kum ba la kynthoh da uwei na ki ‘riew said aiñ ha kane ka Case, u ong “state governments could not provide reservations arbitrarily, as they were constrained by factors like backwardness…”, kaba mut ki jylla kim lah ban mang ka jing-bhah kam,khlem da pyrkhat ïa la ki jingeh ne jinglah bor khamtam kiba dang sahdien. Kum ka jylla Meghalaya kaba nang ran dien ha ka ïoh ka kot bad ba kyrduh kamtam, ka long kaba phylla ba kito ki nongïalam ki ai jingmut ban mang ka jing-bhah kam ïa ki EWS, haba kat ïa la ki briew la jong ruh ngi khlem lah ban pynbiang ai kam ai jam. Khamtam ba ka reservation ïa ki EWS kam long legally binding ïa ki jylla.
9.Kiba ai jingmut ban pynkiew ïa ka jingbhah kam (Reservation) ïa ki OTHER Tribe sha ka 10% ne haduh 15% ka long kaba khlem NONGRIM. Haba pynkiew ïa ka jingbhah sha 10% ne 15%, ka mut ban pynduna ïa ka bhah na ka jong u Khasi-Pnar bad Garo, namar yn ym lah ban pynduna na ka jingbhah ba la mang ïa ki General lane Unreserved 15% kat kum ka Census ka Jylla.
Lada mut ban pynduna ka bhah na ka jong u Khasi-Pnar ne Garo dei ban da don da ka Nongrim lane lada shem ba ka jing bun briew U Khasi-Pnar lane Garo ka la hiar te lah ban pyrkhat ban pynduna ïa ka jingbhah kam na ka bynta jong ki. Kam pat don ruh kano kano ka aiñ ka ban hukum ïa ki Khasi-Pnar lane Garo ban pynduna ïoh khun, te kumno ka jingbun briew jong ki kan duna. Kumba long ka pyrthei, ka jingkiew ka jingbun briew jong kano kano ka jaidbynriew ha ka juh ka thaiñ ka ïa kiew ryntih lang (natural) kumba long lang ha kiwei kiwei ki jaid bynriew ki ba im ba sah lang ha ka juh ka thain, tang lada don kano kano ka jaid briew ba la shu wan rung tuh. Bad lehse kan kham pher bad ki jaid Muslim.
Kat kum ka Census 2011 ka Jylla, ki Other Tribe (ki ba kham bun paid ki dei ki Hajong, ki don 41414 ngut kaba long 1.40%, sa ki Koch ki don 23199 ngut lane 0.78%, ki Rabha ki don 21671 ka ba dei 0.73% bad ki Karbi/Mikir ki don 14380 ngut lane 0.48%. Kine ki dei kiba long kham bun briew duh (Major) na ki OTHER Tribe, bad ka total Percentage jong kine ki 4 tylli ka long 3.39%. Nalor kata, kine hi ki 4 tylli ki Other Major Tribe ha ka Census 2001 (kat kum ka Report ha u Sept. 2013 ba ka sorkar Jylla ka phah sha ka Asian Development Bank, kaba la tip kum ka “Supporting Human Capital Development in Meghalaya – Indigenous People Plan”), ka Percentage jong kine 4 jaid bynriew ka don 3.97% kaba pyni ba ka jingbun briew jong ki ka la nang hiar khyndiat kat kum ka census 2011. Nangta kiba bud ïa kine ki 4 tylli ki Other Major Tribe, don sa ki Other Minor Tribe/Caste, ki don kumba 55/60 tylli ki jait bynriew. Na kita ki Other Minor Tribe/Caste, kiba kham bun briew dei ki Bodo, ki don 4879 ngut bad kiba khyndiat briew eh na ki dei ki KUI bad Koya, ki ïa don u wei u wei u briew; kine baroh ka long kat kum ka Census 2011. Kat kum ka jingbun briew ki Other tribe/Caste kumba la pyni ha ka Census 2011 kan ym palat ïa ka 5%.
Haba ïohi na kitei ki jingpynshisha, kumno ngi lah ban ong ba dei ban pynkiew ïa ka jingbhah kam (reservation) ïa ki Other Tribe/Caste. Khlem da tip ïa ka jingshisha, kita ki nongïalam kim dei ban kren kulmar, namar kan pynïap ei ïa ka jaidbynriew. Khamtam, ba ha kane ka review ïa ka Reservation Policy la ïa pan ban kham pynkiew ka jingbhah kam ïa ki Khasi-Pnar ba ki kham bun briew.
10.Ki ai jingmut ruh ban mang 5% reservation ïa kiba duna ki dkhot met – Ka sorkar kmie (Central Government) ka la buh kyndon 4% ïa kiba don ka jingduna ha ki dkhot met. Ha ka jylla Meghalaya ba kyrduh kam katne katne ym dei ban leh khyllah palat ban ïa ka ba la buh kyndon da ka sorkar kmie.
11.Don pat ki ba ong ba, haba peit, kiba ïoh kam, la bun da ki Khasi-Pnar namar kata ka Expert Committee ka dei ban peit ïa kane ka REALITY – Kam dei kumta. Kito kiba ïohi kumta ki dei ban da peit bniah bha. Da ngi peit bniah, ngin shem ba haka por ba thung kam, ïa u Khasi-Pnar ym ju ai palat ïa ka quota ka ba 40%.
Ngi ïohi ba man ba mih kam, da ki hajar ki Khasi-Pnar kin ïa apply ïa ka kam. Ha ka por interview, ki Khasi-Pnar kin don bun shah ban ïa ki post ba la mang ïa ki. Namar dei ban jied tang na ka bynta ki post ba la mang ïa ki, ïa kiwei kiwei ki ba tam ïa ki number ki post bala mang ïa ki Khasi-Pnar la hap ban kyntait noh. Hynrei kam long kumta ha ki Garo (khamtam mynshwa); bun ki post ba ki Garo kim don candidate ban pyndap ïa la ka quota ba la mang ïa ki; ïa kita ki post ba khlem lah pyndap, ba ym don candidate na ki Garo, la rah shakhmat (CARRY FORWARD) noh sha kawei pat ka snem jingthung kam ka ban wan hadien (kat kum ka Clause 3.4, 3.6 & Clause 4). Ha ka jingthung kam kaba bud, ïa ki Garo kin mang ki post ki ba thymmai bad ki post kiba barim kaba ki la Carry Forward. Ha jingthung kam thymmai haka snem ka bud, haba ïa ki Khasi-Pnar la mang tang 40% ki post, ia ki Garo pat nalor ba la mang 40% la add sa ka ki post ba la Carry forward na ka snem thung kam kaba ladep ha kaba ki khlem lah pyndap. Kaba mut ia ki Garo ki post ki la kham bun, namar bad ïa ki post ba la pynbna thymmai 40% la pynbna lang ruh bad ïa ki post barim kiba la Carry Forward.
Ha kane ka por ruh, katba ki Khasi-Pnar ki pyndap lut baroh ïa la ka quota ba la mang ïa ki, ki Garo pat kim don candidate ban pyndap lut ïa la ki post ba la mang ïa ki.Namar kane ka daw, lehse, haba ngi shim jingkheiñ ïa ki post ba la thung kam ha ka State Level, ngin shem ba ki Khasi-Pnar ki kham bun ïa ki Garo. Haba kumne, ym lah ban ong ba la ai kam kham bun ïa ki Khasi-Pnar ban ïa ki Garo, namar Ki Khasi-Pnar ki lah ban pyndap ïa la ka quota/bhah kaba dei ka hok kat kum ka aiñ, katba ki Garo kim don candidate ban pyndap ïa la ki quota/bhah. Kane ka dei ka REALITY ha kaba ka Expert Committee ka dei ban peit bniah, ym dei ban sngap kat ïa kiba ai jingmut khlem tip ïa ka jingshisha.
C.Hynrei ha ki District Level Employment, ka jingthung kam ïa ki LDA/Steno haduh ki Peon /Chowkidar, ka jingthung kam ïa ki Garo ha Khasi-Jaintia Hills District ka la long palat (excess) ban ïa ki post ba ki dei ban ioh bad ka la long pyrshah ïa ka aiñ ba la bthah da ka Reservation Policy. Kat kum ka Clause 2.2, la bthah ba 80% ki post ha ki District Level, kadei combine ïa u Khasi-Pnar bad Garo; tang badei ban jied kyrpang (preference) ïa ki permanent resident jong ka District. Kaba mut ha Khasi-Jaiñtia Hills District 80% ki post dei ban jied kyrpang shwa ïa ki Khasi-Pnar, ynda la lut ki Khasi-Pnar lah ban jied ïa ki Garo lada dang sah ki post. Pynban kam dei kumta; ngi shem ba ha ka jaka ban mang 80% ïa ki Khasi-Pnar/Garo, (ha Khasi-Jaintia Hills), ki mang pynban 40% Khasi-Jaiñtia bad 40% ïa ki Garo ha Khasi-Jaiñtia Hills District. Da kane, ka jingthung kam ka la long be-ain bad pyrshah ïa ka jingbthah ka clause 2.2, namar ïa ka jingbthah ban jied kyrpang (preference) ïa ki Parmanent Resident la pynduh noh.Ka la long ka jingduh kaba khraw ïa ki Khasi-Pnar, namar ïa ka hok jong ki Khasi-Pnar la ai ei noh ha ki Garo. Kane ka la long la bun bun snem bad ym don ba iohi. Dei lyngba ka jingbud dien u bah Luois Dohtdong uba labuh da ka jingthoh ryngkat ki jingpynshisha (proof) bad u la ïa kynduh ruh ïa u Chief Secretary la ar sien, ha u bnai May 2023 bad ha u bnai March 2024. Hadien kane, ka sorkar ka la pynbeit ïa ka jingpyntrei kam (implementation) jong ka clause 2.2 bad la pynbeit ruh ïaka jingbhah kam/quota ha ka District Level thik kumba la bthah da ka aiñ naduh une u bnai August 2024. Shwa kata, haduh katno ka jingduh ïa ki samla Khasi-Pnar ym lah ban tip. Lehse ka lah ban long kumjuh ha Garo Hills, tang ba ki Khasi-Pnar ki kham kiar ban wad kam sha Garo, khamtam ïaki post ki barit.
Ngin kyrmen ba ka Expert Committee kan bud ïa ka kyndon ba la buh da ka sorkar kmie (Central Government) bad kumba la pyndonkam de da kiwei kiwei ki jylla.
