Shillong, Risaw 29
U rangïalehkai shapdeng ka Manchester City bad Spain, u Rodri u la ïohpdiang ïa ka khusnam Ballon d’Or kaba nyngkong eh hadien ba u la don bynta ban rah ïa ka nam lahduh kaba saw lynter ha ka Premier League bad ka Euro 2024, hynrei ka Real Madrid ka la ‘boycott’ ïa kane ka jingrakhe.
Ka rai ban ai khusnam ïa u rangïalehkai ba tbit tam ha ka pyrthei sha utei u rangïalehkai shapdeng, ka la wan kum ka jingkyndit, ha kaba u Vinicius Junior, uba la jop arsien ha ka lympung Liga bad Champions League na ka bynta ka Real Madrid, la ïohi ba u la long u nongïalehkai uba kham paw. Khyndiat kynta shwa ban pynlong ïa ka jingrakhe ha Paris, ka klob na Spain ka la pynbna ba ka kynhun jong ka kan ym leit sha katei ka jingrakhe ha Chatelet Theatre namar kaei kaba ka la shim ba ka dei ka jingpynjah burom ïa u Vinicius.
U Rodri, 28 snem ka rta, u la lah ban leh ïa ka bynta kaba kongsan ha kaba ka City ka la khanglad ïa ka Arsenal ban rah ïa ka nam lahduh ha ka Premier League ha ka samoi ïalehkai ba la dep bad la jied ïa u kum u rangïalehkai ba tbit tam ha ka Euro 2024 ha kaba ka Spain kaba khlem da khmih lynti ka la long ka nongjop ha Germany.
U Rodri u la long uba sngewrit haba u la jubab ïa ka jingkylli jong ka jingbym lah ban wan jong ka Real sha ka jingïalang bad ki nongthoh khubor hadien ba la ïoh ïa ka khusnam. “Ki don ïa ka rai jong ki, kim shym la kwah ban don hangne namar ki daw jong ki. Hynrei nga shu pynleit jingmut ha ka klob jong nga bad ki para-lok jong nga.”
Wat la ki nongpynïaid jong ka ri France ki la kyntait ba ka jingithuh ïa u nongjop ka dei ka jingmaham kaba la buhrieh bha mynta u snem, hynrei katei ka khubor ka la paw ba ka la mih paw shwa ka jinglehkmen.
Ha kawei pat ka liang ka khlur ïalehkai jong ka Barcelona bad Spain, ka Aitana Bonmati ka la rah biang ha ka sien ba ar ïa ka khusnam Ballon d’Or ha ka liang ki kynthei. Kane ka ‘thei ïalehkai ka la ïalam ïa ka klob jong ka sha ka jingjop kaba saw sien jong ka continental bad ban rah ïa ka Nations League ryngkat bad ka ri jong ka.
