Guwahati, Risaw:
U Myntri Rangbah jong ka jylla Assam, u Himanta Biswa Sarma, ha kine ki khyndiat sngi ba la leit, u la kynthoh jur pyrshah ïa ka seng Congress, da kaba kynnoh ba ka seng ka bat ïa ka “dustur die tiket ilekshon.”
Kane ka jingkren jong u ka long kum ka jingai jubab ïa u MLA ka seng Congress u Umashankar Akela ba la kyntait ïa u ban pynïoh tiket na ka shuki Barhi jong ka Jharkhand namar ba um lah ban siew ïa ka `.2 klur sha ka seng, la ïathuh ka tyllong khubor.
U Sarma u la ong, “Kane kam dei kaei kaei kaba thymmai… Ka seng Congress ka don ïa kane ka rukom leh kaba la slem bha ha ka ban die kumba 20 percent ki tiket jong ka. Ka ju jia haman la ki jylla.”
U Sarma uba long u nongpynïaid lang jong ka seng BJP na ka bynta ka ilekshon ha Jharkhand u la pynpaw ïa ki jingeh jong ka liang pyrshah hashwa ka ilekshon ha ka jylla, da kaba ong, “Ka kynhun NDA ka buh uwei u kyrtong ha kawei ka shuki, ka kynhun INDIA ka ïakhun pyrshah ïa ka jingïakynad ban ïasam shuki.”
U Akela, u bym shym la ïoh tiket, u la kam ba un ïoh ïa kawei lada u siew ïa ka pisa ba la buh dor, kumba la bna khubor. Hynrei ka seng Congress ka la kyntait ïa kane ka jingpynshisha, da kaba ong ba la iehnoh ïa u namar ka jingbym lah jong u ban leh bha.
Ha ka sngi Palei, ka seng Congress kaba ïakhun ilekshon hapoh ka lama jong ka kynhun synrop INDIA, ka la pyllait paidbah ïa ka thup kyteng ba ar jong ki 7 ngut ki kyrtong na ka bynta ka ilekshon sha ka Jharkhand Assembly ka ban wan, kaba la pynkiew sha ka 28 ngut ki kyrtong.
U Arun Sahu u la shah pynbna kyrteng ban ïakhun na Barhi. Hapoh ka kynhun synrop INDIA, ka Jharkhand Mukti Morcha (JMM) bad ka Congress kin ïakhun ban ïoh 70 tylli na ki 81 tylli ki konstitwensi, ha kaba ïa ki konstitwensi kiba sah yn ai sha ki seng synroplang jong ki.
Ka ilekshon ha Jharkhand kumba la buh kan long ha ka 13 bad 20 tarik u Naiwieng, ha kaba ka jingñiew vote kan long ha ka 23 tarik u Naiwieng.
