Guwahati, Risaw:
Ki la don baroh kumba 38 ngut ki kyrtong kiba dei ban ïakhun na ka bynta ki san tylli ki Assembly konstitwensi ha Assam ha kaba yn pynlong ïa ka ilekshon shiteng samoi ha ka 13 tarik u Naiwieng naba ka jingpynrung kyrteng ka la kut ha ka sngi Thohdieng jong ka taïew ba la lah, ha kaba 24 ngut ki kyrtong ki la leit ban aiti ïa ki kot ki sla jong ki ha ka sngi ba khatduh jong ka jingpynrung kyrteng, la ong ka khubor ba la pynmih da ki heh ba dei khmih.
Ha ka sngi Thohdieng, ki la don lai ngut ki kyrtong kiba la thep kyrteng na Dholai, uwei na Sidli, san ngut na Bongaigaon, 12 ngut na Samaguri bad lai ngut na Behali.
Ki kyrtong ba pawkhmat ha kane ka jingïakhun haduh mynta ki long u Diplu Ranjan Sarma jong ka BJP ha Samaguri, ka Diptimoy Choudhury jong ka AGP kaba dei ka kurim jong u Phanibhushan Choudhury uba long u MLA ba phra sien ha Bongaigaon, ka Jayata Bora jong ka Congress ha Behali bad u Suddho Kumard Basumad jong ka Bodo People’s Front.
Ka Congress ka ïakhun ïa baroh san tylli ki konstitwensi. Ka ilekshon shiteng samoi ka la long kaba donkam hadien ka jingjied ïa ki MLA sha ka Lok Sabha ha basdang une u snem.
U kyrtong ka Congress na Samaguri u Tanzil Hussain u dei u khun jong u MLA ba mynta u Rakibul Hussain uba la shah jied sha ka Lok Sabha na Dhubri Parliamentary konstitwensi ha kaba u la jop bun bha da palat 10 lak vote.
U MLA ka BJP jong ka Dholai uba dei ruh u Myntri barim ka kynhun myntri u Parimal Suklabaidya u la shah jied sha Lok Sabha na Silchar Parliamentary konstitwensi katba u para kyrtong na ka seng jong u u Ranjit Dutta na Behali u la jop ïa ka shuki jong ka Sonitpur Lok Sabha.
U MLA ba mynta jong ka Bongaigaon u Phanibhushan Choudhury u la shah jied na Barpeta Lok Sabha konstitwensi katba u MLA ka UPPL na Sidli u Joyanta Basumatary u la shah jied na Kokrajhar Parliamentary konstitwensi.
Ka jingthep vote kan long ha ki san tylli ki konstitwensi ha ka 13 tarik, Naiwieng bad ka jingñiew vote kan long ha ka 23 tarik, Naiwieng.
