Imphal, Risaw:
Ki pulit jong ka Manipur ki la kem ïa phra ngut ki dkhot jong ka kynhun ba la shahñiew beaiñ ka United Liberation Front of Manipur (Pambei) bad ïoh ban kurup ïa ki tiar bad ki kuli ïasiat na ki ha Thoubal distrik, la ïathuh ka jingthoh ba la phah da ki heh pulit hynnin ka sngi.
Ki dkhot jong ka kynhun lehnoh UNLF (P) ki la shahkem ha ka Lah Sngi U Blei halor ka jingbyrngem ïa ki briew bad khanglad ïa ka jingpyntreikam ha ka ban phiah bad pynbeit pud ïa ka jaka ha ka distrik Thoubal, la ong ka jingthoh ba la phah.
Lai tylli ki suloi AK 47, ar tylli ki suloi AK 56, kawei ka suloi M-16, kawei ka pistol 9mm, 147 tylli ki kuli bym pat pyndonkam jong ka AK 47, 20 song ki kuli M-16, 25 song ki kuli ka 9 mm, 16 tylli ki Mobile Phone bad kawei ka SUV la ïoh ban kurup haba la khmih bniah na ki, la bynrap shuh shuh ka jingthoh.
Hynrei, ïa u bom kawang kti la lap na ki phalor jong ka GP Women’s College, kaba don ha ka jaka kaba jngai hapoh ka 100 metres na Raj Bhavan ha Manipur, ha ka step jong ka Lah Sngi U Blei, la ïathuh ki pulit.
Kane ka jingjia ka la pyntieng pynsyier khamtam ïa ki nongleit-nongwan.
Ki pulit hadien ba la don ba pyntip ba u la don u bom kawang kti, ki la pynlong ïa ka jingleit kerkut ïa katei ka thaiñ, la ong u heh pulit.
