Shillong, Risaw 29
Ka kynhun tem jong ka jingrwai ba pawnam, “The Final Countdown” – ‘Europe’, kan wanphai biang sha India hadien 36 snem ban ïashim bynta ha ka ‘MelGong Festival’ ka ban long ha Tura ha u bnai ban wan.
Kane ka tamasa ba ar sngi, kaba la buh ban long ha ka 29-30 tarik u Naiwieng, ka long ka por kaba kongsan na bynta ki ‘riew ieid jingrwai ‘Rock’ jong ka Thaiñ Shatei Lam Mihngi ka ri India.
Kane ka kynhun tem na Sweden, kaba la tem khatduh ha Mumbai ha u snem 1988, kan ïasam lang ïa ka rynsan bad ka kynhun tem ‘Rock’ ba la rim ka India, ka ‘Indus Creed’ bad ka kynhun tem ‘fusion’ ba paw, ka ‘Euphoria’. Ha kane ka tamasa, yn sakhi ruh ïa ka jingïashim bynta jong ka Udita Goswami (DJ). Ïa kane ka tamasa la kyrshan da ka tnad kam jngoh kai pyrthei ka Jylla.
Ki sap ki phong na ka thaiñ lajong ruh ki ban ïashim bynta lang ha kane ka tamasa ba kynthup ïa ka ‘Da Suraka’, ‘Haystack Ladies’ bad ‘Summersalt’ nalor kiwei.
Ka ‘Europe’, kaba la lamkhmat da u Joey Tempest, ka la kiew sha ka kyrdan jong ka nam ha ka pyrthei ha u snem 1986 lyngba ka ‘album’ – “The Final Countdown”.
Ki dkhot ba mynta jong ka kynhun ki kynthup ïa ki dkhot nongseng, u John Norum (Guitar), John Levén (Bass), Mic Michaeli (Keyboard), bad Ian Haugland (Drums).
Kane ka tamasa kaba la pynlong da ka VAS Inc. bad ka Ivory Valley ka long hadien ka jingjop jong ka kylla banyngkong ha u snem ba la dep ha kaba la wan ïashim bynta ïa ka kynhun rwai ‘Pop’, ka ‘Vengaboys’ bad u nongrwai Bollywood, u Armaan Malik.
