Shillong, Risaw 30
Namar bym don mano-mano ba weng kyrteng, ka ilekshon MLA shiteng samoi ha Gambegre konstitwensi kan sa sakhi ïa ka jingïakhun jong 6 ngut ki kyrtong kiba la dep ban thep kyrteng bad kiba biang lut ki kot ki sla jong ki.
Ka 30 tarik Risaw (Sngi Balang) ka dei ka sngi bakhatduh ïa ki kyrtong kiba kwah ban weng kyrteng na ka jingïakhun. Hynrei ha kane ka sngi ym don satia mano-mano na ki kyrtong kiba weng kyrteng noh, kaba la pynlong ïa u Returning Officer ban pynmih ïa ka jingpynbna ba ki don 6 ngut ki kyrtong kiba ïakhun bad ha kane ka sngi la ai ruh ïa ka shap ilekshon (election symbol) sha ki ar ngut kyrtong shimet.
Kine hynriew ngut ki kyrtong ki long ka kurim u Myntri Rangbah, ka Dr. Mehtab Chandee A Sangma kaba la thep kyrteng kum ka kyrtong ka National People’s Party (NPP), u Jingjang M Marak uba dei u kyrtong ka Indian National Congress (INC), ka Sadhiarani Sangma kaba dei ka kyrtong ka All India Trinamool Congress (AITC), nalor u Bernard N Marak kum u kyrtong ka Bharatiya Janata Party (BJP). Ki kyrtong shimet ki long u Sengkrabirth M Marak bad Jerry A Sangma. U Sengkrabirth u la ïoh ïa ka shap ilekshon da ka bateri taslait, katba ka shap ilekshon jong u Jerry A Sangma ka dei ka miej. Ki saw ngut kiwei pat ki kyrtong kiba dei jong ki seng saiñ pyrthei, ki la dep ïoh lypa ïa ka shap ilekshon jong ki.
Ka jingthep vote ha Gambegre konstitwensi kan long ha ka 13 tarik Naiwieng bad ka jingñiew vote ha ka 23 tarik Naiwieng. Ka Gambegre konstitwensi ka la sah thylli khlem MLA hadien ba u MLA ka Congress u Saleng A Sangma u la iehnoh kum u MLA ha ka 10 tarik Jylliew mynta u snem namarba u la shahjied kum u MP na Tura Parliamentary konstitwensi.
